Hvað gerist ef hér er kosið á vormánuðum?

Ríkisstjórnin er það eina sem stendur á milli siðmenningar og skrílræðis á Íslandi í dag.  Vissulega er ríkisstjórnin ekki að gera góða hluti, en hún er það besta sem við höfum í stöðunni, og gildir einu þó að fámennir hópar safnist saman oft í viku og krefjist skrílræðis; þeir skulu fá að ráða sem hæst baula.

Hvað gerist ef hér er kosið á næsta ári?  Fólk myndi jú kjósa í bræði, þökk sé mannvitsbrekkum eins og Agli Helgasyni sem virðast hafa það eitt að markmiði að espa upp fólk með pöpulisma og slúðri, og viðbúið er að hér myndum við fá Vinstri Græna í stjórn.  Það að fá Vinstri Græna er sennilega það allra versta sem gæti komið fyrir þjóðina, og það sjá í raun allir sem á annað borð hafa snefil af skynsemi.

Vinstri Grænir myndu byrja á því að umturna landinu enn eina ferðina og stefna þjóðinni glórulaust inn í misheppnaða mannfræðitilraun sem myndi hafa það að markmiði að búa til alræði skrílsins.  Hér yrði allt bannað sem ekki yrði leyft, og myndu Steingrímur og Ögmundur skýla sér á bak við "sérstakar" aðstæður sem myndu kalla á ótímabundin og gríðarleg höft á einstaklingsfrels (hér yrði bannað að stofna fyrirtæki, VG myndi sölsa undir sig almennan rekstur í landinu og vísa í að þjóðinni sé best borgið undir verndarvæng hins opinbera).

Tillögur VG undanfarið hafa rennt stoðum undir þetta.  Steingrímur sagði í viðtali að hann sæi framtíð lands og þjóðar í greinum eins og ullariðnaði, skinnavinnslu, kornrækt, og áburðarframleiðslu.  Í atvinnumálum bjóða VGistar upp á hraðvagn beint til 1960, aðra leiðina.  Ef þú ert viðskiptafræðingur, hagfræðingur, eða verkfræðingur þá er ekkert pláss fyrir þig í kommúnískri útópíu Steingríms.

VG myndi byrja á því að stórhækka hér skatta til að koma til móts við þá sem eru á hinum og þessum bótum.  Vissulega á hluti þeirra sem þiggja bætur engra annara kosta völ, en þeir eru líka margir sem í iðjuleysi og afætuhætti leggjast á spenann og heimta að ríkið sjái þeim fyrir öllu (man eftir að hafa lesið viðtal við einn aðila í síðustu viku sem sagði að sér hefði aldrei liðið betur en þegar hann vann svart, borgaði ekki skatta, en börnin hans sóttu skóla og nutu allrar þjónustu hins opinbera).  Það sem myndi gerast að stór hluti fólks sæi engan hvata í að fara að vinna, og myndi því leggjast á hliðina og hirða bætur.  Þar með byggjum við í þjóðfélagi þar sem ríkið eyddi margfalt fleiri krónum en það aflaði, því atvinnuþátttaka myndi stórminnka og þeir sem eftir væru yrðu sífellt meira skattpíndir.

Gríðarlegur fólksflótti myndi eiga sér stað þegar menntað fólk myndi koma sér í burtu til landa þar sem það ætti séns á að skapa sér gott líf fyrir eigin dugnað, en ekki húka á Íslandi þar sem Vinstri Grænir myndu mergsjúga alla þá sem voga sér að hafa tekjur.  

Hér yrðu festar í lög alls kyns kreddur sem VG heldur á lofti og snúa að opinberum afskiptum í lífi þegnanna.  Hér yrði ýmis hegðun sem VG skilgreinir sem "óæskilega" væntanlega bönnuð, hvort sem það er karlremba eða réttur til að velja sér fulltrúa óháð kynferði þeirra.  

Ástandið er erfitt í dag, en með dugnaði er þetta ekkert stórmál.  Með því að segja við fólk, við ætlum að búa svo í haginn að þið fáið að uppskera eins og þið til sáið án afskipta ríkisins, án þess að eiga á hættu að skríllinn komi og hirði uppskeruna, þá náum við í gegnum þetta.

Eins og staðan er í dag, eins og skríllinn hegðar sér og talar, þá mun þjóðin skiptast í tvennt, hinir duglegu munu einfaldlega fara því enginn nennir að dröslast með þetta vinstrapakk á herðunum endalaust, og afæturnar munu verða eftir og mergsjúga hver aðra þangað til ekkert verður eftir nema auðnin ein.

Það er skylda okkar sem viljum efla verðmætasköpun að halda vinstriöflunum frá völdum.  Einungis frelsi einstaklingsins og framtakssemi hans mun skila landinu á réttan kjöl, og það er útilokað að við náum okkur á strik ef fólk eins og Steingrímur og Ögmundur komast til valda með illa ígrunduðu valdaráni næsta vor, í skjóli skrílsins sem baular hvað hæst.

 

Mótmælendur eiga ekki að bíta

Athugasemdir

[Launaþrællinn (IP-tala skráð) 9.12.2008 kl. 14:26]

Ef VG og Samfó fara saman í stjórn myndi verða hér efnahagslegur kjarnorkuvetur sem myndi vara í áravís.

VG skilja ekki hugtakið atvinnulíf, en Samfó heldur að það að ganga í ESB sé atvinnusköpun.

Eitt er víst, ég mun örugglega flýja land héðan sem efnahagslegur- og pólitískur flóttamaður.

[Birgir Hrafn Sigurðsson, 9.12.2008 kl. 15:17]

Já, ég mun einnig flytja burt ef VG -/- Samfylkingin nær hér undirstöðu.

[Birgir Hrafn Sigurðsson, 9.12.2008 kl. 15:23]

Ég og Kærastan mín og vinur minn erum að íhuga að fara og mótmæla þessum mótmælum næsta laugardag. Ég var að spá í að koma með heitt kakó, kaffi og kökur handa lögregluþjónunum,minns er samt dáldið hræddur við að þessir mótmælendur muni hreinlega ráðast á okkur og berja en það kemur allt í ljós hversu "friðsælt" þetta í raun og veru er.

[Héðinn Björnsson, 9.12.2008 kl. 15:34]

Þið hægrimenn eruð búnir að stjórna landinu í 17 ár og hafið skilið eftir ykkur brenndan akur og vonlausa þjóð sem stefnir hraðbyr í borgarastríð og landflótta. Það treystir ykkur enginn fyrir stjórn á þessu landi og það er ekki nema von. Valdaskifti munu eiga sér stað  með friðsamlegum eða ófriðsamlegum leiðum enda ekki nema nokkrir mánuðir í að fólk hætti að borga reikningana sína og taki að verja heimili sín með valdi, enda standi ríkið ekki undir því að verja heimili fólks fyrir ágangi auðmanna landsins. Stjórnin nýtur ekki traust og hefur því ekki vald til að breyta þessu samfélagi til hins betra.

Við verðum að breyta þessu landi svo það fari að starfa fyrir hagsmuni venjulegs launafólks og hætti að láta allt snúast um að vernda hag hinna ofurríku. Þær breytingar verða ekki gerðar undir forystu núverandi stjórnarflokka. Gott væri að fá nýjan hægriflokk og nýjan miðjuflokk til að gefa VG almennilegt óspillt mótspil frá þeim hópum samfélagsins sem ekki eru vinstrisinnar en að halda því fram að venjulegt fólk eigi að bynda traust sitt við núverandi ríkisstjórn er hreint út sagt fáránlegt.  Af ávöxtunum skulu þið þekkja þá...

[Elías Þórsson (IP-tala skráð) 9.12.2008 kl. 15:44]

Tek undir með Héðni. Þú segist vera talsmaður skynsemi, en ég vil vita á hverju þú byggir þessar fullyrðingar þínar um VG. Þú nefnir engin dæmi, kemur með engin rök og vitnar ekki í neitt, þú bara einfaldlega gefur þér að allt sem þú segir sé satt. Ekki finnst mér þetta skynsamur málflutningur. Svo er þetta Laisze-fair bull gjörsamlega komið á hausinn. Við gáfum ákveðnum mönnum lausan tauminn, án afskipta ríkisvaldsins og þess vegna erum við komin í þessa stöðu. Svo vil ég benda þér á að það að það eru skandinavísku vinstri löndin sem töppa næstum alla skala í mannlegri velferð og þróuðum lýðræðisstofnunum.

 Ef ekki verða gerðar drastískar breytingar á stjórnarháttum í þessu landi, þá sé ég enga ástæðu fyrir því að koma heim.

[Einar Jón, 10.12.2008 kl. 12:07]

Hvað gæti mögulega versnað við að fá vinstristjórn?

[Guðmundur (IP-tala skráð) 11.12.2008 kl. 13:46]

Launaþræll, hér er efnahagslegur kjarnorkuvetur. Í boði Alþingis, ríkisstjórnar Sjálfstæðisflokks, Seðlabanka og útrásarvíkinganna.

Og Liberal, það er vel hægt að gagnrýna VG og gera það málefnalega. Hins vegar er færslan þín rakalaus þvættingur sem virðist byggjast helst á einhverju vafasömu ofsóknarbrjálæði (tek það fram að ég er ekki í VG, hef aldrei kosið VG og þeir mega hverfa mín vegna, rétt eins og aðrir flokkar sem eru núna á þingi).

[Guðmundur (IP-tala skráð) 11.12.2008 kl. 13:47]

"...í boði ríkisstjórnar Sjálfstæðisflokks og Samfylkingar..." átti þetta að vera.