Nú þarf Ögmundur að svara þessu!

http://gunnaraxel.blog.is/blog/gunnaraxel/#entry-692239

 

Ögmundur Jónasson, stjórnarmaður og fyrrum stjórnarformaður lífeyrissjóðs starfsmanna ríkisins, LSR, var duglegur að fjárfesta í áhættufjárfestingum, taka fjöregg þjóðarinnar og fjárfesta í því sem hann hefur (sem þingmaður) hvað harðast mótmælt.  Hvað hefur LSR tapað miklu fjármunum vegna þess að Ögmundur ákvað að reyna að græða sem mest á sem stystum tíma og nota til þess almannafé?  Við hljótum að krefjast svara.

 

"Ögmundur hefur gengið fram fyrir í gagnrýni sinni á stjórnvöld, bankana, talað um græðgi og tilkynnt þessari blindu þjóð að hann hafi jú vitað þetta allan tímann. Hann og félagar hans í VG vissu allan tímann að bankarnir voru byggðir á sandi, að útrásarsöngurinn var innantómt væl.

Hvernig stendur þá á því að Ögmundur Jónasson tók ekki ákvarðanir í samræmi við þessa vissu sína þegar hann ráðstafaði því sem með sanni má kalla fjöregg þjóðarinnar, lífeyrissjóði opinberra starfsmanna, á bál þeirrar gróðahyggju sem hann vill nú ekki kannast við að hafa nokkru sinni kynnt undir?

Verður vinstrisinnaði verkalýðsforinginn ekki að svara fyrir þetta áður en hann gefur sjálfum sér hvítþvottarstimpilinn?"

 

85% af vergri landsframleiðslu

Já, sæll... eigum við að ræða það eitthvað?

Seðlbankinn og ríkisstjórnin hafa verið algerlega ófær um að taka eina einustu réttu ákvörðun undanfarnar vikur.  Ef ákvarðanir hefðu verið teknar af handahófi hefðu þeir ekki getað tekið eins margar lélegar og vondar ákvarðanir.

Seðlabankinn er sennilega ónýtasta stofnun landsins, stjórn bankans virðir ekki viðskiptabankana viðlits og hegðar sér eins og ríki í ríkinu.  Þegar vextir voru lækkaðir um daginn hélt maður að kannski væri komin einhver smávegis skynsemi inn í þetta bákn, því þetta vaxtastig sem var var allt að drepa og gerði það að verkum að fólk og fyrirtæki gat ekki fyrir nokkra muni tekið lán, sem eru nauðsynleg til að viðhalda rekstri heimila og fyrirtækja (þó svo að mannvitsbrekkur eins og Egill Helgason haldi annað).

Auðvitað á Seðlabankinn að spyrna gegn verðbólgu, en þegar verðbólgan mælist í gær um 16% á ársgrundvelli þá er það allra heimskulegasta sem Seðlabankinn gerir að hækka vexti.  Því verðbólgan er ekki neysludrifin, heldur gengisdrifin.  Krónan hrundi sem bein afleiðing af klúðri Seðlabankans og ríkisstjórnarinnar (sér í lagi þjóðnýtingu bankanna), sem svo hækkar allt verðlag hér heima fyrir.  Það setur verðbólguna vissulega af stað, en fólk er ekki að kaupa meira en það gerði (kaupa meira fyrir sama pening) heldur minna en það gerði (fær sama fyrir meiri pening).  Enginn hagnast á verðbólgunni hérna heima.  Og í þetta skiptið er verðbólgan skilgetið afkvæmi Seðlabankans. 

Og hvað gerist núna þegar Seðlabankinn hækkar vexti?  Jú, afborganir af lánum hækka, líklegt er að krónan veikist enn meira sem þýðir enn meiri verðhækkanir á mat og reikningum heimilanna, sem svo þýðir enn meiri verðbólgu (samkvæmt mælingum Seðlabankans) og hann hækkar svo aftur vexti! Þessi hækkun stýrivaxta kemur á sama tíma og þúsundir landsmanna missa vinnuna og þúsundir annara sjá fram á rauntölulækkun launa (t.d. bankastarfsmenn sem voru skikkaðir til að taka á sig launalækkanir).  Hér hækka allar nauðsynjar og öll lán, á meðan fólk fær færri krónur útborgaðar.  Þeir landsmenn sem eru svo heppnir að halda vinnunni og óbreyttri krónutölu í laun munu samt sem áður sjá tuga prósenta kaupmáttarrýrnun.  

Verði ykkur að góðu.  Þið þurftuð ekki að kjósa yfir ykkur Vinstri Græna til að landið myndi upplifa efnahagslegan kjarnorkuvetur.  Geir, Davíð, og Björgvin sáu alveg um það fyrir þá.  

Það er aðeins ein leið út úr þessu, og hún er að skynsamt fólk myndi stjórnmálaafl sem hefur til vegs og virðingar gildi millistéttarinnar, gætir hagsmuna meðaljónsins.  Það er gullin ávísun á áframhaldandi hrun að velja einhvern af þessum handónýtu vinstriflokkum sem eru í hverju sæti á Alþingi.

Stýrivextir hækkaðir um 6 prósentur

Hin kalda krumla ríkisins að herða tökin

Það er sorglegt að sjá hvernig komið er fyrir mínum gamla flokki, Sjálfstæðisflokknum.  Það lítur allt út fyrir að hin kalda ríkiskrumla muni læsa klóm sínum sífellt fastar í líf okkar, og þar sem fyrir nokkrum dögum var kveðið að ríkiseign á bönkum yrði bara tímabundin er nú farið að kyrja þann söng að kannski sé bara best að ríkið eigi bankana áfram, alla vega stóran hluta þeirra.

Þróunin er geigvænleg.  Sjálfstæðisflokkurinn hefur snúist upp í allt sem hann hefur í gegnum tíðina barist gegn, hann er nú orðinn talsmaður hafta, ríkisafskipta, boða og banna.  Það virðist stefna í það að fulltrúar Sjálfstæðisflokksins muni koma til með að verja með kjafti og klóm þá bitlinga sem þeir hafa sölsað undir sig, skipun nýrra stjórna í bankana verður eflaust lituð af flokkapólitík og það kæmi mér ekki á óvart að við myndum heyra gamalkunnan söng á næstu misserum; ríkið þarf að beita öllum stjórntækjum sínum til að koma þjóðarskútunni á flot, þar á meðal bönkunum.

Ég held, er í raun sannfærður miðað við hvernig Geir og Björgvin tala, að ríkið muni festa í sessi ríkisrekstur í fjármálakerfinu, og mögulega víða annars staðar í gegnum eignarhald sitt á bönkunum þegar hin og þessi fyrirtæki leggja upp laupana undan oki rústa fjármálakerfisins sem mun skella af fullum þunga á okkur á næstu mánuðum.  Fjölmörg fyrirtæki munu verða að eign bankanna í gegnum veðsetningu, og verða þá orðin eign ríkisins.  Það sem ég óttast að þá gerist er að þessir sömu menn og lögðu bankakerfið í rúst munu tala um hversu mikilvægt það sé að nota bankana til að koma hlutunum í gang aftur, og þá beri að horfa til t.d. byggðasjónarmiða og setja fjármagn í "góð" og "atvinnuskapandi" verkefni úti á landi, svona til að vega upp á móti kvótaskerðingu eða einhverju viðlíka.  Góðir viðskiptahættir og rekstrarlegar forsendur verða látnar víkja fyrir því að afla þingmönnum vinsælda í sínu héraði.

Og þá verður auðvitað að skipa "rétt" fólk í stjórnir bankanna sem tryggir að vilji ríkisins nái fram að ganga í rekstri þessara ríkis-stofnana sem bankarnir eru að verða.

Margir munu eflaust segja það bara hið besta mál, tími til kominn.  Slíkir aðilar eiga tvennt sameiginlegt, skilja ekki út á hvað bankastarfsemi gengur út á og vera örgustu sósjalistar.  Og því miður virðast slíkir aðilar ráða lögum og lofum í ríkisstjórn og Seðlabanka.

Það sem í upphafi var sagt vera tímabundið inngrip, af illri nauðsyn, virðist því miður stefna í að verða varanlegt fyrirkomulag sem pólitíkusar eru mjög sáttir við, því völdin hafa öll verið færð undir þá aftur.  Kreml eða Valhöll, munurinn á þessu tvennu er allt í einu orðinn mjög óljós. 

	Listin vinsælli en bankarnir
Ábyrgðarmaður færslu Tenging við þessa frétt hefur verið rofin vegna kvartana.

Félögin sem eru eftir í

Alfesca 

Bakkavör

Icelandair

Marel

Straumur-Burðarás   

Össur

Af þessum hlýtur að teljast líklegt að Alfesca og Bakkavör verði tekin af markaði fljótlega, mögulega Straumur-Burðarás líka.  

Þá munum við hafa 3 félög í "úrvals"vísitölunni, Marel, Icelandair og Össur.

takk fyrir það 

Atorka óskar eftir afskráningu

Lóa Pind og höfuðfötin

Smá tískulöggukomment...

Hvað í fjandanum er Lóa Pind með á hausnum á þessari mynd?  Jújú, hún er vonlaus fréttamaður ("... viðskiptahallinn einn og sér nægir til að kaupa SS pylsur sem, ef tengdar saman á endunum, myndu ná hálfa leið til Mombassa....!"), en þegar hún mætir með dauða, bleika kyrkislöngu um hausinn getur maður ekki annað en brosað.  

Rætt við norræna seðlabanka

Ekki bjartsýnn á að neitt komi út úr þessu

Ég er ekki bjartsýnn á að neitt komi út úr fundum helgarinnar annað en einhverjar hálfkaraðar málamyndaaðgerðir, í ætt við það sem verið hefur.

Ef Davíð er á þessum fundum má búast við því að engar tillögur verði teknar til umræðu aðrar en honum eru þóknanlegar, og það er löngu ljóst að hann ber ekkert skynbragð á þá hættu sem að okkur steðjar.

Ég hef alla tíð verið yfirlýstur andstæðingur ESB aðildar vegna þess að hingað til hafa hagsmunir okkar ekki farið saman við hagsmuni ESB.  Núna er ég kominn á öndverða skoðun.  Það mun taka okkur um 10 ár að vinna okkur út úr því klúðri sem Davíð hefur valdið (gleymum ekki að málin fóru úr því að vera vandamál yfir í það að vera ragnarök þegar Davíð þjóðnýttu bankann), og ESB aðild gæti flýtt batanum.  Við erum eins og einstaklingur sem þarf að svipta sjálfræði.

Ég held, því miður, að mest verði rætt um helgina atriði sem engu máli skipta í raun og veru, eins og einhver hugmyndafræðilegur ágreiningur um ágæti ESB aðildar, hvort skera eigi niður þetta eða hitt í fjárlagafrumvarpinu, þegar ljóst er að við verðum að fá, fyrir kl. 9 á mánudagsmorgun, staðfestingu á því að hingað inn í landið komi ca. 600 milljarðar í erlendum gjaldmiðli í gegnum ýmsar leiðir, og að við getum sett fram trúverðuga stefnu til framtíðar í efnahagnum, bæði hvernig staðið verður að vaxtaákvörðunum, skipulagi Seðlabanka, og margt fleira.

Til þess hafa fundarmenn til kl. 9 á mánudagsmorgun þegar gjaldeyrismarkaður opnar aftur.  Verði ekki komið með "dúndur" áætlun og skýra stefnu, auk tímalínu fyrir innstreymi 600 milljarða á næstu 1-2 vikum, þá erum við, til að vitna í skáldið, fokkt.

Tekist á um ESB-tillögu

Brot af því besta úr fjárlögum 2009

Til hamingju skattgreiðendur, þið fáið að borga fyrir eftirfarandi tæpa 10 milljarða á næsta ári:

 

Krónan enn í frjálsu falli

Já, gríðarlega mikilvægt og efst í huga þjóðarinnar akkúrat í dag...

ólafur ragnar er nú alger meistari.  Séð&Heyrt kóngurinn hefur mælt.  Þjóðin hefur bara hugsað um eitt undanfarna daga, og það er hvernig hún geti haldið almennilega upp á 1. desember eftir 10 ár.  Aðgerðaáætlun er það sem þarf.

Helst að skipa stóra nefnd sem leggst yfir málið og kemur með drög að kostnaðaráætlun næstu ára sem miðar að því að eyða nógu miklum peningum í svona opinberar veislur og hátíðahöld.

Sennilega sér ólafur ragnar fram á það að um hægist í djamminu hjá sér nú þegar hálf þjóðin er komin í gjaldþrot og enginn til að bjóða honum í partý lengur.  Þá þýðir ekkert að leggjast í kör og sjálfsvorkunn, onei.  Þá er bara að láta Alþingi skipuleggja fyrir sig partý á kostnað almennings og best að taka upp nokkra nýja hátíðisdaga með tilheyrandi kokkteilboðum og útgjöldum ríkisins.

Alltaf getur maður treyst á tvennt; veruleikafirringu ólafs ragnars og botnlausa viðleitni vinstrimanna í að sólunda almannafé í vitleysu.

ólafur ragnar, þjóðinni er skítsama um 1. desember.  Okkur gæti ekki verið meira saman.  1. desember 2018 verður ekkert fullveldi hér á landi (með góðu eða illu verða vinstrimenn búnir að koma okkur inn í ESB) og því ekkert að halda upp á.  Svona soldið eins og að halda upp á afmæli Danadrottningar í dag, svona af því bara.

ólafur ragnar, þjóðinni er skítsama um 1. desember.  Frí í skólum var vel þegið í den þegar maður var í grunnskóla, en þar með er það eiginlega upp talið.  Í guðanna bænum farðu ekki að leggja til einhverja milljónatuga útgjöld sem leggjast á þjóðina, sem nú þegar liggur mölbrotin í vegarkantinum eftir aðgerðir kommúnistanna í Sjálfstæðisflokknum.  Ég veit þér finnst það ömurlegt að partýunum fyrir þig skuli fækka, en þú verður bara að taka því eins og maður.  Þjóðin hefur engan áhuga á því að borga fyrir kokkteilveislur fyrir þig og þína frú bara vegna þess að ykkur leiðist á kvöldin. 

Færa þarf þjóðinni 1. desember á ný

Áskorun á sanna Sjálfstæðismenn að stofna nýjan flokk!

Hvað gerist nú?  Geir hefur keyrt landið í þrot, gengisvísitalan bankar í 210 stig og viðbúið að verðbólgan fari í hátt í 20% við næstu mælingu.

Gríðarleg kaupmáttarrýrnun er yfirvofandi með bylgju verðhækkana á matvælum og íbúðalánum, án samsvarandi hækkana launa.

Árni Matt leggur fram fjárlagafrumvarp þar sem boðuð er aukning á ríkisútgjöldum.

Geir er búinn að kalla botninn reglulega síðan í febrúar.  Og alltaf versnar ástandið.

Það er ekki einu sinni að maður hafi þann munað að geta sagt að vinstrimenn hafi komið okkur í þetta klandur.  Nei, það voru Geir og Davíð.  Tveir síðustu formenn míns flokks.

Hvað er annað í stöðunni?  Ríkistjórnin springi og við taki Ögmundur, Guðni, Jón Magnússon, og Ingibjörg Sólrún?  Kannski myndu hlutirnir ekki versna (enda varla hægt), en þeir myndu pottþétt ekki batna.  Maður hefur ekki einu sinni þann muna að geta leyft sér að blóta stjórnvöldum í sand og ösku og heimta að fá Sjálfstæðisflokkinn til valda að þrífa upp eftir þetta lið.  

Ég hef sagt skilið við Sjálfstæðisflokkinn í bili, ég hef aldrei kosið sósíalista til áhrifa og myndi því miður gera það með atkvæði greiddu Sjálfstæðisflokknum.  Þjóðnýtingarflokknum.

Ég skora á fulltrúa millistéttarinnar, fylgismenn frjálshyggju, einstaklingsfrelsis og minnkandi ríkisusvifa að mynda með sér stjórnmálaflokk, kljúfa sig út úr hinum vinstrisinnaða Sjálfstæðisflokki, og mynda hreyfingu skynsemi og aðhalds.  Eins og staðan er í dag, eigum við sem aðhyllumst þær skoðanir munaðarlaus.  En vinstrimenn og kommúnistar hafa hins vegar um alla flokka landsins að velja um þessar mundir. 

Sjálfstæðisstefnan er horfin, miðstéttin er án talsmanns

Ef vel hefði verið við hlustir lagt hefði mátt heyra þrusk í kirkjugörðum landsins síðustu vikur og mánuði, þegar öflugustu kyndilberar einstaklingsfrelsis og sjálfstæðis í gegnum söguna sneru sér við í gröfum sínum, allt frá Jóni Sigurðssyni.

Sjálfstæðisflokkurinn, minn flokkur í gegnum tíðina, hefur gengið að sjálfstæðishugsjóninni dauðri og breytt flokknum mínum í klasturskennt miðjumoð sósíaldemókratísks lýðskrums.  Í mínum huga er enginn munur í dag, eftir fréttir um fjárlagafrumvarpið, á Sjálfstæðisflokki og Samfylkingu.

Sjálfstæðisflokkurinn hefur í gegnum tíðina lagt sig í líma við að tryggja frelsi einstaklingsins og minnka umsvif hins opinbera.  Sjálfstæðisflokkurinn undanfarin 3-4 ár, eða svo, hefur lagt sig fram um að skerða rétt einstaklinga og nú síðast með þjóðnýtingu vel rekins fyrirtækis og svínaríi á ellefu þúsund hluthafa fyrirtækisins sem eru margir hverjir rúnir varasjóði sínum.

Áður en gáfnaljós eins og Egill Helgason fara að tjá sig um þetta mál af valinkunnri vanþekkingu, þá má líkja ástandi fjármálamarkaða við eftirfarandi dæmisögu sem allir geta skilið, svona ef við rýnum í söguna eins og hún hefur verið sett fram í fjölmiðlum undanfarna daga:  Þú ert í góðri vinnu og hefur fjármálin á hreinu, svona eins og frekast er unnt í óðaverðbólgu og óvissu.  Þú ert reyndar með yfirdrátt í bankanum upp á 300þ sem er ekkert stórmál, þú ætlar bara að borga hann niður hægt og rólega ásamt öllum öðrum skuldum þínum og hefur til þess plan (hafa vinnu, spara peninga, eyða ekki um efni fram o.s.fr.).  Nú er 15. dagur mánaðarins og allt í einu hringir bankinn í þig og segir að þú hafir 7 daga til að borga niður yfirdráttinn, verði það ekki gert muni hann ganga að eigum þínum.  Þú hváir og segir að þú fáir nú ekki útborgað fyrr en eftir 15 daga, þú þurfir einfaldlega meiri tíma.  Nei, segir bankinn, þú skalt borga innan viku annars verði húsið þitt selt á uppboði.  Þú ferð í aðra banka og reynir að fá yfirdrátt þar, í von um að þeir verði sanngjarnari, en allt kemur fyrir ekki.  Enginn er til í að lána þér, frekar en nokkrum öðrum.  Að lokum ferðu til "ríkisbankans" í von um að þar verði þér sýnd sanngirni.  Sem og gerist.  Ríkisbankinn gerir þér það kostaboð að kaupa af þér húsið þitt á 300þ krónur svo þú getir borgað bankanum þínum, og svo máttu búa í húsinu eitthvað aðeins áfram, en færð engu ráðið um hvernig það mun koma til með að líta út eða hvort einhver einstök herbergi verði leigð út til annara.  Og þjónustufulltrúi ríkisbankans kemur svo fram nokkrum dögum síðar og segir að þarna hafi þeir sko gert "dúndur bisness!".

Glitnir ert þú, í þessari sögu.  Menn geta alltaf sagt að kannski hefðir þú, eða bankinn, ekki átt að taka yfirdráttinn til að byrja með.  Kannski ætti aldrei neinn að taka lán.  Það væri þá áhugaverður heimur.  

Pétur Blöndal er þjónustufulltrúinn og talar um þjóðnýtingu sem "dúndur bisness".  Það er ekki sjálfstæðisstefnan.

Davíð Oddsson og Geir Haarde þjóðnýta vel rekið fyrirtæki þegar aðrar leiðir ku hafa verið færar, að mati þeirra sem hafa tjáð sig um þau mál síðustu daga.  Þjóðnýting með það að leiðarljósi að láta ríkið græða er ekki sjálfstæðisstefna.  Það er það sama og Pútín gerði með Yukoz olíufyrirtækið. 

Og nú síðast leggur Árni Matt fram fjárlagafrumvarp sem miðar að því að reka ríkissjóð með sextíuþúsundmilljóna tapi á næsta ári.  Engin tilraun er gerð til að skera niður útgjöld ríkisins samhliða minnkandi tekjum.  Bara reka með tapi og láta svo kjósendur borga brúsann.  Þegar allir aðrir eru beðnir um að spara, skera niður, sýna ráðdeild, þá kemur ríkið (stærsti einstaki þátttakandinn í íslensku hagkerfi) og fer í þveröfuga átt.  Eykur þenslu (sem mun seinka vaxtalækkun Seðlbankans og auka verðbólgu) með tilheyrandi verðhækkunum á mat og nauðsynjum til almennings.  En það verður væntanlega allt þess virði þegar við fáum sæti í Öryggisráðinu og getum fjölgað í sendinefnd okkar hjá SÞ upp í 40 manns eða svo.  Það verður gott til þess að vita þegar bensínlítrinn verður kominn í 200 krónur og mjólkurlítrinn í 150 kr.  

Á næsta ári ætlar Ingibjörg Sólrún Gísladóttir að eyða um 600 milljónum af almannafé (1% af fjárlagahallanum) í íslenska skálann á heimssýningunni í Peking.  Af því að henni finnst það svo góð hugmynd.  Ekki dettur ríkisstjórninni í hug að spara, eins og krafa er gerð á almenning um að gera, þegar að kreppir.  Þá fara kratarnir af stað og vilja eyða eins og enginn sé morgundagurinn.

Ég hef því tekið þá ákvörðun að ég ætla ekki að eyða atkvæði mínu á vinstrimenn frekar en áður, vera trúr mínum hugsjónum.  Ég ætla því ekki að kjósa Sjálfstæðisflokkinn framar í kosningum nema snúið verði aftur á braut þeirra hugsjóna sem ég, og þúsundir annara frjálshyggjumanna höfum aðhyllst og barist fyrir.  Ef ég vildi kjósa kommúnista og sósjalista, þá myndi ég kjósa Samfylkinguna eða Vinstri Græna, ekki kommúnista og sósjalista sem dulbúast sem Sjálfstæðismenn. 

Reiknað með halla á fjárlögum