Ljótt hús og vitlaus borgarstjóri... eða öfugt

Húsið er forljótt og fáránlegt að einhverjar listaspírur, atvinnuiðjuleysingjar sem lifa á spena samneyslunnar, skuli arka fram og heimta risavaxna höll á besta stað í borginni, bara af því að þeim finnst þau svo merkileg.

Húsið er ljótara en allt sem ljótt er, passar engan veginn inn í "götumyndina"... nær væri að smella þessu húsi upp í Asparfell þar sem það myndi passa svona líka vel inn í "götumyndina" þar.

En borgarstjórinn er algjör idjót.  Ég hef sjaldan séð aðra eins sneypuför og hann gerði í Kastljósið í gær, vorkenndi sjálfum sér, vældi og skældi, og gat svo engu svarað.  Talaði um sjálfan sig í þriðju persónu (sem hlýtur að vera klárt merki um mjög miklar kerfisvillur á háaloftinu).  Það er eitthvað svo óendanlega kómískt við tilhugsunina um Ólaf og Jakob Frímann saman að plotta hvað er gott PR og hvað ekki.  Knold og Tott, fyrir þá sem eftir þeim muna.

Nú finnst mér að það megi henda þessu fjandans húsi út í hafsauga eins og það lítur út, og ef skarfakálsétandi menningarvitarnir í LHÍ eru ósáttir við það geta þeir bara byggt sinn skóla annars staðar.  Afsakði, haldið okkur skattgreiðendum í gíslingu og krafist þess að við byggjum utan um þá skóla annars staðar.  Því ekki skapar þetta listapakk nein verðmæti.

Og ef við getum hent þessum handónýta borgarstjóra út með kofaskriflinu, þá væri það jafnvel enn betra. 

Vaxandi óvissa um Listaháskóla

Borgarstjóri steiktur!

Borgarstjóri mætti í viðtal hjá Helga Seljan í Kastljósinu í gærkvöldi, og sjaldan hef ég séð aðra eins frammistöðu.  Ólafur var eins og lítill krakki, var greinilega með þá skipun frá Jakobi Frímanni að "stjórna umræðunni og tala um góðu hlutina" og byrjaði því að rausa um hreinan miðbæ og grettistök.

Sem var ekki það sem verið var að ræða.

Ólafur sat þarna og var gríðarlega sár yfir að hann skyldi spurður óþægilegra spurninga, skildi hreinlega ekkert í því.  Vældi og skældi.

Best var samt þegar viðtalið var búið og Þórhallur var að kynna næsta lið, þá sá maður í bakgrunninn hvar Ólafur spratt á fætur og strunsaði út og hreytti einhverjum ónotum í Helga.

Ég spyr hreinlega:

a) er hægt að skilgreina mann sem talar stanslaust um sjálfan sig í þriðju persónu nokkuð annað en snar tjúllaðan?

b) hvað er svona labbakútur að gera í þessari stöðu, eiginlega?  Fattar minn flokkur, Sjálfstæðisflokkurinn, ekki hvers konar álfur hann Ólafur er?

c) heldur Ólafur virkilega að það fyrirfinnist einhvers staðar á gervöllu landinu aðili sem ekki hlær að honum og smábarnalátunum í honum?

Hentistefnu-stefna Samfylkingarinnar

Nú er það vitað og alkunna að Samfylkingin hefur enga stefnu í neinu máli, hefur aldrei haft og mun líklegast aldrei hafa.

ESB var sko hreint ekki á dagskrá fyrir ári síðan, en er nú allt í einu orðið aðalmálið hjá spenaliggjurum kratanna.

En það verður að teljast nýmæli að nú hafi þingmenn þessa bráðskemmtilega flokks ólíkar skoðanir eftir því hvar þeir eru staddir á landinu.  Minnir óneitanlega á þegar formaður flokksins talaði stíft GEGN álveri á Bakka þegar hún var stödd sunnan heiða, en um leið og norður yfir Holtavörðuheiði var komið STUDDI hún álver á Bakka með ráðum og dáð.  Og svo varð hún aftur ANDVÍG álverinu á Bakka þegar hún kom til baka í bæinn.  Merkilegt er vald heiðanna.

Björgvin er skemmtilegur fír.  Glórulaus með öllu, utangátta og í alla staði fullkomlega óhæfur í starf sitt.  Sem er samt fyndið á svona Monty Python legan hátt.  Hann styður, stundum, álver í Helguvík, en stundum ekki.  Svona allt eftir því við hvern hann er að tala hverju sinni.  

Nú er sem sagt hin stefnulausa og ákvarðanafælna Samfylkingin ekki lengur með ótal skoðanir á sömu hlutunum yfir einhvern tíma, heldur með ótal skoðanir á téðum hlutum á sama tíma, allt eftir því hvar viðkomandi þingmaður tjáir sig um hlutinn.

Þetta er ótrúlegt afrek hjá stjórnmálamönnum, verð ég að segja.

Annars kórónar Björgvin kjánaganginn í sér þegar hann segist ekki vera búinn að taka endanlega afstöðu til álvers í Helguvík.  Hann er vonandi að bíða eftir enn einni skoðanakönnuninni sem segir honum að hann má vera fylgjandi því í Reykjanesbæ, móti á Selfossi, fylgjandi á Húsavík, en á móti í teboði með Össuri og Þórunni.  Eða kannski fylgjandi.  

Björgvin skoppar eins og korktappi í ólgusjó skoðana og ræður ekki neitt við neitt. 

Ítrekuðu andstöðu við virkjanir

Þriðji möguleikinn er þó líklegastur

og hann er sá að umhverfissnobbarar hafa hreinlega gengið of langt og það er ekki fyrir skynsamt fólk að taka mark á yfirganginum og frekjunni í sérhagsmunasamtökum eins og Landvernd og eins-manns-samtökununum hans Árna Finnssonar.

Við þurfum vegi til að komast frá A til B, og á meðan þessir háværu umhverfis terroristar sem hafna öllu raski og öllum framkvæmdum neita að sýna því skilning, þá geta þeir varla ætlast til að fúnksjónalt þjóðfélag taki mark á þeim.

Ef Árni og aðrir fengju að ráða væri allt bannað sem mögulega gæti raskað náttúrunni.  Bannað væri að nýta hana, bannað væri að ganga á hana, bannað væri að fórna hlutum hennar fyrir meiri hagsmuni (enda engir hagsmunir æðri hagsmunum náttúrunnar í huga þeirra).  

Það er til marks um pólitískt þor að standa uppi í hárinu á þessum háværu afturhaldsöflum, þor sem ráðherrar á borð við Þórunni og aðra tækifærislundaða Samfylkingartindáta virðist upp til hópa skorta með öllu.  Nema Kristján Möller.  Ekki svo að ég sé að hrósa Kristjáni fyrir eitt né neitt annað, hann á ekkert slíkt inni. 

Sakar samgönguráðherra um skilningsleysi

Hvað er blaðamaður að spá?

"Bangladess er eitt af fátækustu ríkjum veraldar og yfirvofandi loftslagsbreytingar ógna lífsskilyrðum tugmilljóna íbúa. Bráðnun íss og jökla á Norðurslóðum mun leiða til hækkunar sjávarborðs um allan heim og stór landsvæði í Bangladess geta horfið undir haf. Líklega er engu landi í veröldinni ógnað á viðlíka hátt og Bangladess með bráðnun íss sem loftslagsbreytingar á Norðurslóðum hafa í för með sér. Byggðir munu hverfa og fæðuöflun verða ærið torveld. Þróunin í heimshluta okkar Íslendinga getur haft hrikaleg áhrif á lífsskilyrði hundruða milljóna í Asíu. Hinu alþjóðlega þingi í Dakka er ætlað að leiða í ljós að allar þjóðir þurfa að taka höndum saman."

 Já, er það já?  Yfirvofandi loftslagsbreytingar?  Hverjar nákvæmlega?  Ekki eru neinar breytingar sannanlega í vændum, þó vissulega sé ofsatrúarlest "global warming" á fullri ferð án mikilla vísindalegra raka.  Loftslagsbreytingar á Norðurslóðum?  Byggðir munu hverfa?  

Er til of mikls ætlast að blaðamenn segi fréttir, en noti ekki starf sitt sem sápukassa fyrir eigin skoðanir og prédiki þær sem heilagan sannleik?   Umhverfissnobbið og gagnrýnislaus rétthugsunin gerir engum neina greiða og skemmir bara fyrir lausnum á raunverulegum vandamálum og skilgreiningu þeirra. 

 

Forseti Íslands til Kína

Björgvin hinn snjalli

Björgvin verður seint sakaður um að vera "með" hlutina.  Hann er líklegast óhæfasti ráðherra ríkisstjórnarinnar, sem er ekki lítið afrek þegar maður horfir á þá staðreynd að meirihluti þeirra er óhæfur til starfa sinna.

Í fyrsta lagi hefur Björgvin ekki hugmynd um hvað verður, hann er síðasti maðurinn sem Kaupþingsmenn og Spronmenn myndu segja hvað væri í spilunum.  Aðal Björgvins er að koma reglulega fram í fjölmiðla og blaðra hugsunarlaust um hluti sem hann hefur ekkert vit á, en rennir í grun að gætu haft jákvæð áhrif á það hvernig kjósendur hugsa til hans.

Björgvin vill ólmur setja lög á einkafyrirtæki sem segja hvað margir stjórnarmenn mega vera karlkyns og hvað margir kvenkyns.  Því rauðsokkum finnst svoleiðis svo sniðugt.  Burtséð frá því hversu skynsamlegt slíkt er eða hvort það sé yfirhöfuð löglegt.

Þannig að þegar Björgvin kemur fram í fjölmiðla og þykist leiðrétta einhvern misskilning, eða vill fullvissa þjóðina um eitthvað, þá getur maður bókað að hann hefur ekkert fyrir sér og veit líklegast ekki um hvað hann er að tala.  Þess vegna er þessi "yfirlýsing" hans um málefni samrunans yfirtökunnar algerlega merkingarlaus.  

Ráðherra trúir ekki á uppsagnir

Egill + Bubbi + Björk + Guðmundur = Sönn ást?

Varla.

Bubbi er líklega sjálfumglaðasti Íslendingurinn sem uppi hefur verið, og eru þar margir til kallaðir.  Þegar hann klifrar upp á sinn háa hest og talar niður til allra hinna er varla að maður nenni að hlusta, nema fyrir það að líklegast segir hann eitthvað yfirmáta heimskulegt og þá getur verið skemmtilegt að heyra það frá fyrstu hendi.  Móðgast í alvöru einhver þegar Bubbi þykist vera mestur og bestur?

Björk er líklega mesta umhverfissnobb landsins.  Jújú, hún má alveg halda tónleika (sem hún nota bene hélt ekki ein, heldur með álfahópnum Sigurrós) og tileinka þeim hvaða málefni sem er, en hún mætti alveg sleppa því að hrauna yfir allt og alla í viðtölum erlendis sem innanlands, og tala um hvað Íslendingar séu miklir aumingjar.  Kannski ætti hún að setja hlutina í samhengi.  Gott að berjast fyrir náttúrunni, fínt mál.  En að drulla yfir fólkið í landinu sem er henni ekki sammála er lélegt og sýnir að hún er lítið annað en menningarvitasnobb.  Hugvit og kænska dugar sumum til að lifa af, en við getum Björk, ekki öll orðið heimsfrægir tónlistarmenn eins og þú.

Guðmundur.  Come on, þú ert pabbi Bjarkar.  Björk er fullorðin og hlýtur að þola gagnrýni án þess að þú rjúkir til og rífir þig ofan í suðurenda.

Egill Helgason.  Konungur kverúlantanna.  Punkturinn aftan við i-ið í kjánahrolli samtímans.  Auðvitað þarf hann að blanda sér inn í þetta, því hann hefur svo miklar skoðanir.  Og eins og alþjóð veit þá eru í huga Egils bara til tvær skoðanir á öllum málum.  Hans eigin og svo röng skoðun.  Í alvöru, tekur einhver mark á rausinu í rauðhærða ríkisstarfsmanninum?  Egill spyr á bloggi sínu hvaða bóla verði næst til að springa?  Kannski það verði "ofmetnir sjónvarpsþáttastjórnendur sem hafa ofurtrú á eigin ágæti, óverðskuldað" bólan.  Ég vona það.

Ritdeilan um hvort Björk megi spila fyrir lækjarsprænur og hvort Bubbi hafi tapað "ógeðslega" miklu í hlutabréfaviðskiptum er dæmi um gúrkuna í fjölmiðlum í sumar. 

Síðasti maðurinn til að tjá sig um rekstur álvera

er án efa umhverfissnobbarinn Árni í þessum samtökum.

Hvað í ósköpunum telur hann sig geta talað um hvar eigi að virkja og hversu mikið?  Og af hverju hefur þessi paría svo að segja óheftan aðgang að óprófessjónal blaðamönnum?

Árni er yfirlýstur andstæðingur ríkisstjórnarinnar, hann hefur sagt að þeir sem styðja ríkisstjórnina geti ekki verið umhverfisverndarsinnar, og virðist ekki víla fyrir sér að fara með rangt mál til að þjóna sínum hagsmunum.

Árni er síðasti maðurinn í landinu sem getur sagt til um hvað þurfi að virkja og hversu mikið þegar kemur að þessu máli, og það er engu og engum til framdráttar að trilla þessum trúði fram í hvert skipti sem Alcoa eða virkjanir komast í fréttirnar.

Stórt álver kallar á virkjun Skjálfandafljóts

Fótum troðið lýðræði í ESB

Af hverju er Samfylkingin svona hrifin af ESB?  Getur verið að meðhöndlun lýðræðis í ESB eigi sér hljómgrunn hjá hinni lýðræðiselskandi forystu Samfylkingarinnar?

Samfylkingin, undir stjórn Ingibjargar Sólrúnar, hélt kosningu um framtíð flugvallarins í Vatnsmýrinni.  Settar voru reglur um hvort kosningin yrði "bindandi" (sem í sjálfu sér er marklaust hugtak í hugarheimi Samfylkingarinnar), og svo kom "rétt" niðurstaða en kosningin var ekki bindandi samkvæmt reglum sem settar voru.  Ingibjörg breytti þá bara reglunum eftir á til að þóknast eigin hugmyndum.

Í fyrra hélt Samfylkingin kosningu í Hafnarfirði um stækkun álversins í Straumsvík, og er ótrúlegt að forystumenn flokksins þar hafi ekki orðið kleyfhugar í kjölfarið.  Íbúar felldu hugmyndir um stækkun, nokkuð sem Samfylkingin átti ekki von á, og þá var reglunum (aftur) breytt eftir á.  Bæjarstjórinn sagði að sko bara núverandi meirihluti væri bundinn af kosningunni, svo væri líka alveg mögulegt að stækka álverið á núverandi lóð.  Þetta var sem sagt allt í plati, svona fyrst kjósendur gátu ekki haft vit á því að kjósa rétt.

ESB boðaði til kosninga árið 2005 um stjórnarskrá sambandsins, flaggskip þess til framtíðar.  Kjósendur létu skoðun sína í ljós og sögðu forystumönnum sambandsins í ómyrku máli nákvæmlega hvert þeir gætu stungið þessu plaggi.  ESB ákvað þá að láta stjórnarskrána samt sem áður taka gildi, enda skiptir vilji kjósenda engu máli, og endurskýrði stjórnarskrána "Lissabon sáttmálann", og bannaði ríkjunum að láta greiða um hann atkvæði.  Nema Írlandi sem ákvað engu að síður að fara þá byltingarkenndu leið að leyfa íbúum landsins að hafa hönd í bagga með róttækar breytingar á stjórnskipun síns eigin lands.  Írar sögðu forystumönnum ESB nákvæmlega hvar þeir gætu stungið Lissabon sáttmálanum, og er þá orðið þröngt á þingi í þeirri geymslu ESB sinna.

Nú eru góð ráð dýr.  En Nicolas Sarkozy hefur sagt að það sé auðvitað til sanngjörn og einföld lausn á þessu; láta bara Írland kjósa aftur!  Jú, þeir hafa greinilega ekki gert upp hug sinn varðandi stækkun ESB (svo maður noti frasa Samfylkingarinnar þegar einhver er ósammála Ágústi Ólafi og hinum klappstýrum ESB), og því mikilvægt að þeir kjósi aftur... og aftur... og aftur... og aftur... þangað til þeir kjósa rétt, og samþykkja sáttmálann.  

Samfylkingin og ESB eiga það sameiginlegt að vera hópar lýðskrumara sem boða umræðustjórnmál og íbúalýðræði, en bara, og eingöngu, ef þeir sem tjá sig og greiða atkvæði eru sammála Samfylkingunni eða ESB.  Annað er ekki leyft.  Það kallast að vera ekki búinn að gera upp við sig málefnin.

Hæfir því skel kjafti, myndi ég segja.  Og þjóðin mun ekki samþykkja það að afsala sér fullveldi sínu til þess eins að kennari á Bifröst geti hlammað sér niður enn einn ríkisspenann, nú í Brussel, og farið í þykjustuleik í stjórnmálum. 

Hvernig gæti ályktun Samfylkingarinnar um þetta hljómað?

Ef við gefum okkur að Samfylkingin myndi álykta um þetta mál, svona í anda þess hvernig þeir álykta um ESB umræðuna í öðrum flokkum, gæti afraksturinn orðið eitthvað á þessa veruna:

Samfylkingin kallar eftir því að VG taki afstöðu til virkjanaframkvæmda og stóriðju í Helguvík, og að fram fari ítarleg skoðun og umræða um slíka hluti innan Vinstri Grænna.  Nú þegar síaukinn þrýstingur er á þjóðfélagið að fagna stóriðju og þeirri verðmætasköpun sem hún hefur í för með sér, þá er nær óþolandi að einn stjórnmálaflokkur skuli ekki vera búinn að taka umræðuna, og í raun kæfi hana í hvert skipti sem hún kemst á flug og neiti að taka afstöðu.

Það er jú þannig að í huga Samfylkingarfólks eru þeir sem eru flokknum ósammála einfaldlega ekki búnir að hugsa málið og þurfa því að fara aftur heim til sín og hugsa málin betur, alveg þangað til "rétt" lausn er komin, þ.e.a.s. að allir séu sammála skoðun Samfylkingarinnar.  

Þar sem Björgvin og Össur hafa ákveðið að nýta Fagra Ísland sem annars flokks þerripappír á útisalerni því sem stefnuskrá Samfylkingarinnar er, þá gefur auga leið að allir sem ekki deila ruglingslegri og mótsagnarkenndri stefnu Samfylkingarinnar í umhverfis- og iðnaðarmálum séu einfaldlega ekki búnir að "taka umræðuna".

Annars gef ég ekki mikið fyrir þessa könnun, það er í hæsta máta ólíklegt að flokkur eins og fjallagrasaétandi kommúnistar geti gert óháða könnun um mál sem þeir eru ekki búnir að gera upp við sig. 

Fleiri á móti en með álveri í Helguvík