Sakleysislegt myndband við hrútleiðinlegt lag með pirrandi hljómsveit

Gat nú verið að fólk færi að fjargviðrast út í myndband sem sýnir fólk dandalast um berrassað úti í skógi.  Ég gæti best trúað að meðal kökubasar kvenfélags úti á landi hafi meiri perra-undirtón en þetta myndband.

En lagið sjálft er eins og önnur lög sveitarinnar, hrútleiðinlegt og tilvalið til þess eins að láta mann fá dúndrandi höfuðverk.  Það er líklegast leitun að leiðinlegri hljómsveit en Sigurrós, sem sannar hið fornkveðna að ekki verður um smekk manna deilt.

Skemmtanagildi Sigurrósar er í mínum huga svipað og að fara í rótarfyllingu án deyfingar hjá blindum tannlækni með Parkisons.  En ef þeir geta laðað fólk að tónlist sinni með seventís softkor klámi, þá er það allt í lagi. 

Myndband Sigur Rósar bannað

Það tekur verkakonu 25 þúsund ár að skapa sömu verðmæti

Má ekki stilla því þannig upp?

Ef þú færð greitt fyrir hverja "einingu" ábyrgðar, þá held ég að verkakonan fái miklu meira greitt per einingu en forstjórinn.

Mikið rosalega er hún kjánaleg þessi öfund út í þá sem hafa háar tekjur.  Kaupþing er almenningshlutafélag og þeir sem eiga það fyrirtæki ráða sjálfir hvað þeir borga sínu starfsfólki í laun.  ASÍ kemur það ekki við, stjórnvöldum kemur það ekki við, engum öðrum en eigendum kemur það neitt við.

Ef einhver er ósáttur við laun forstjórans, þá getur sá hinn sami bara farið með sín viðskipti annað og neitað að spila með, eða selt hlutabréf sín í bankanum.

En nei, alltaf skal maður finna einhverja kverúlanta sem halda því fram að Ísland hafi einhvern tíma verið stéttlaust þjóðfélag og einu sinni, í den, hafi allir verið jafnir.  Smávegis innlit í sögu lands og þjóðar afsannar þá þjóðsögu. 

Ef forstjórinn væri með helmingi lægri laun, en verkakonan sömu laun, væri hún þá eitthvað betur sett?  Síðan um áramótin hafa einhver X hundruð milljarða "horfið" úr Kauphöllinni og auðjöfrar landsins fátækari sem því nemur, og hafa þá samkvæmt þessari skemmtilegu hundalógík vinstrimanna, færst "nær almúganum".  Er almúginn þá betur settur?  Svona fyrst "jöfnuður" hefur aukist? 

Mér er alveg sama hvað aðrir eru með í tekjur.  Fólk á að verðleggja sitt vinnuframlag eins og það sér það, og hætta að spá í hvað aðrir eru að gera.  Þú skapar ákveðin verðmæti með þinni vinnu og átt að fá greitt samkvæmt því (og það er hægt að verðleggja alla vinnu og verðmætasköpun, ef menn svo kæra sig um, hvort sem um er að ræða pípara eða kennara eða forstjóra), ekki meira og ekki minna.

Röfl og tuð og væl út í hvað næsti maður er með mikið þjónar engum tilgangi öðrum en að staðfesta að sá sem röflar og tuðar og vælir er þjakaður af minnimáttarkennd og öfund.  Enginn virðist hörgullinn á slíku fólki hjá ASÍ, ef dæma má af þessari frétt.

Sjöfaldar ævitekjur á einu ári

Ótrúleg heimska Ungra Vinstri Grænna

Bíðum nú aðeins við.  Múgsefjunin í kringum hinn pólitíska rétttrúnað sem VG virðist ástunda líkt og trúarbrögð lítur út fyrir að vera að ná hámarki.

Það er greinilegt að arfleifð og menning okkar er skiptimynt í huga þessara ungu og ofdekruðu krakkakjána sem þrá fátt heitar en að vera hipp og kúl og að allur umheimurinn álíti Ísland Nirvana hippakynslóða samtímans.

Við erum kristin þjóð og höfum verið í þúsund ár.  Tungumál okkar er íslenska, og hefur verið um alla tíð.  Það er ekki þar með sagt að við getum ekki sýnt öðrum tungumálum og öðrum trúarbrögðum fyllstu virðingu, kynnt þau og kennt í skólum og svo framvegis.  En eftir sem áður erum við kristin þjóð, þó ekki séu allir einstaklingarnir kristnir.

En nei, ekki í huga hinna ofdekruðu ungu kommúnista.

Þeim finnst ótækt að kennd séu kristin gildi í skólum, því það er á einhvern hátt móðgun við þá sem ekki eru kristnir.  Þeim finnst eflaust líka ósanngjarnt að útlendingar sem hingað koma séu skyldaðir til að læra íslensku áður en þeir fá ríkisborgararétt.  Því þá erum við bara forpokuð og ekki kúl.

Ég fagna þessu frumvarpi, ekki vegna þess að ég sé "virkur" í kristinni trú heldur vegna þess að ég er stoltur af menningu og sögu minnar þjóðar og þó ég fagni því að hingað komi fólk annars staðar frá, þá hef ég lítinn áhuga á að menning og saga minnar þjóðar sé sett út á Guð og gaddinn, bara til að koma í veg fyrir að kannski finnist útlendingum það oggupínupons óþægilegt að taka eftir að hér hefur fólk búið í nokkuð margar aldir.

Kannski Ung Vinstri Græn ættu að líta upp úr Stalínískum kennslubókum um pólitískan rétttrúnað og íhuga að hætta að lifa í sínum rústrauða fílabeinsturni. 

Ung VG lýsa yfir óánægju með þingmenn VG

Hver man eftir forsíðu Þjóðlífs fyrir 19 árum?

Íslendingar eiga að gera klárt fyrir orkuskipti

Framsóknarmenn samir við sig

Tekur einhver mark á framsókn í dag?  Varla.

Örflokkur sem stendur bara fyrir afturhald, mykjumokstur og þröngsýni.  Framsóknarflokkurinn á heima uppi í sveit.  Guðni og Framsókn skilja ekki út á hvað 20. öldin gekk (enda föst á þeirri 19.) og þaðan af síður 21.

Flokkurinn hans Guðna ber ábyrgð á því að við búum við handónýtt landbúnaðarkerfi sem byggir á lénsskipulagi miðalda, og þannig vill Guðni hafa það áfram.  Flokkurinn hans Guðna ber ábyrgð á því að við búum við óskilvirkt og rándýrt heilbrigðiskerfi sem kostar þjóðina of fjár í gegnum óhæfa stjórnendur og skilningsleysi á rekstri.  Og þannig vill Siv hafa það.

Guðni ætti að tala minna og einbeita sér að því að vinda ofan af hugmyndafræðilegri eyðimörk síns flokks og drífa sig inn í nútímann.  En það er væntanlega til of mikils ætlast.

Ríkisstjórn brostinna vona

Flísin og bjálkinn

Merkilegt að Guðjón skuli sjá flísina í augum annara, svona í ljósi þess að hann er með heilan skóg í eigin augum.

Hans örflokkur var hernuminn af Nýju Afli, er samnefnari lægstu hvata mannskepnunnar, hugsar bara um kvóta, og er svo margklofinn að maður efast um að nægjanlega margir meðlimir séu í flokknum til að standa undir klofningsframboðunum.

En hvað um það, Guðjón Arnar hefur aldrei lagt fram neinar tillögur (nema þegar hann ruglaði saman persónuafslætti og skattleysismörkum um árið og Halldór Ásgríms tók hann í kennslustund) og virðist bara getað nöldrað um kvóta og útlendinga.

Hann er sérfræðingur í að vera ósamstíga, hann er formaður í mest klofna flokki sögunnar og virðist ekki einu sinni sjálfur ganga í takt við eitt né neitt, ekki einu sinni sjálfan sig (sveik hann ekki Sigurjón á sínum tíma, fagnaði hann ekki að Ólafur F. væri borgarstjóri í ca. 10 mínútur þangað til Jón Magnússon bannaði honum það?)

Guðjón á nákvæmlega enga innistæðu fyrir þessu rausi og gaman verður í næstu kosningum þegar við losnum við þessa óværu af þingi.

„Ósamstíga stjórn"

Allir vinna... nema íslenskir neytendur

Til hamingju Vinstri Grænir, nú hafið þið unnið sigur í þessu mikilvæga máli gegn íslenskum neytendum.  Við höfðum möguleika á að fá mun ódýrari matvæli en hið ónýta landbúnaðarkerfi skammtar okkur, en ykkur tókst af miklu harðfylgi að koma í veg fyrir að við fengjum meira fyrir aurinn.

Því útlenskt kjöt er svo baneitrað, segið þið.  Stórhættulegt.  Ekki fólki bjóðandi.  Alla vega ekki Íslendingum (því við erum víst betri en allar aðrar þjóðir).  Það er víst ótrúlegt að við sem ferðumst í útlöndum skulum yfirleitt lifa af ferðalagið og ekki hreinlega springa í loft upp af öllu eitrinu.

Íslenskir bændur vilja þetta auðvitað ekki, því þeir búa í ónýtu kerfi og geta ekki (og vilja ekki) keppa við erlent kjöt sem er bæði betra og ódýrara en það sem þeir bjóða.  Kjúklingabringur skulu sko kosta 2500 kr/kg og engar refjar.

Vinstri Grænir vilja auðvitað ekkert innflutt, því það gerir það að verkum að ríkisrekið landbúnaðarkerfi minnkar að umsvifum, og allt sem minnkar aðkomu ríkisins er bannað í huga Vinstri Grænna.

Takk, Vinstri Grænir, fyrir að bregða fæti fyrir neytendur og standa vörð um miðaldakerfi sem heldur bændum og heimilum í fjötrum.  Það má alltaf stóla á ykkur til að standa vörð um ónýt kerfi og skammtakerfi.

Matvælafrumvarpi frestað

Þessi lögga verður vonandi án atvinnu á morgun

Algerlega óverjandi með öllu.  Enda myndi ég segja að það væri óásættanlegt ef þessum aðila yrði ekki vikið úr starfi strax.

En það gat auðvitað verið að umræða færi að snúast upp í það að lögreglan sem heild sé óhæf, og einhvern veginn vilja menn blanda inn í þessa umræðu tazer byssum.

Svo á örugglega einhver eftir að krefjast þess að Björn Bjarnason segi af sér út af þessu, því það verða jú alltaf til hálfvitar.

Eitt rotið epli í lögreglunni (og þau eru örugglega fleiri) er engin ástæða til að banna eðlilegan útbúnað lögreglunnar, sem er nú þegar vanbúin í átökum við harðsvíraða krimma.  Auðvitað á að láta lögregluna frá stuðbyssur (sem eru sennilega öruggasta varnartækið sem lögreglan getur fengið, þó svo að útúrsnúningar á rannsóknum séu ofarlega í huga VGista). 

Það verða alltaf óhæfir aðilar í lögreglunni, það eru til kennarar sem eru algerlega misheppnaðir í starfi (og sem beita nemendur ofbeldi), prestar, læknar, götusóparar.  Eigum við að láta setja upp eftirlitsmyndavélar í skólastofum bara vegna þess að einn kennari gerist sekur um ofbeldi?  Hvað með að gelda alla presta?  Bara svona til öryggis. 

Margir virðast algerlega ófærir um að hafa hlutina í samhengi og keppast um titilinn, Dramadrottning Bloggsins, og eru þar margir tilkallaðir.  En skynsemin segir okkur að þarna hafi aðili gerst sekur í starfi, á því skal tekið (það er sjálfsögð krafa), og honum vikið úr starfi sínu.  Punktur.  Framferði þessa aðila segir ekkert um mögulegt framferði allra hinna 99.5% lögreglumanna sem standa vörð um okkar öryggi.

Lögregla fer yfir atvik í 10/11

Nú? Allar fimm?

Frjálslynt Nýtt Afl er nú svona örflokkur, nýtur lítils sem einksis fylgis, og þegar maður deilir í þá sem elta þetta fyrirbæri með tveimur (til að fá út fjölda kvenna) þá er sennilega fjöldinn hlægilega lítill.

En hvað um það.  

Þessi lög eru hið mesta þarfaþing og í raun leiðrétting á mjög slæmri tvísköttun sem átt hefur sér stað.  Fyrirtæki greiða tekjuskatt af hagnaði sínum, og fyrirtæki sem hafa hagnað af sölu hlutabréfa borga nú skatt af hagnaði við söluna, og svo aftur skatt af hagnaði fyrirtækisins, fyrst 10% og svo 18% af því sem eftir er.

Rasistunum í Nýju afli finnst þetta eflaust sanngjarnt, en þegar betur er að gáð er það viðhorf (eins og önnur sem þessi flokkur hefur uppi) óverjandi.

Það má hins vegar alveg færa rök fyrir því að fella eigi niður fjármagnstekjuskatt alfarið, og/eða koma á flötum 15% skatti á allar tekjur, sama hvaðan þær koma.  Ég væri vel fylgjandi því.

En niðurfelling skatta er nokkuð sem ég er alfarið fylgjandi, og betra að það sé að hluta til en alls ekki.

Kvenfélagið í Frjálslyndu Nýju Afli má vel nöldra fyrir mér, en það er kannski mál að árétta að málflutningur þess hefur engan hljómgrunn nema í örþröngum hópi kvótaáhugafólks og illa gefinna trukkabílstjóra. 

Konur í Frjálslynda flokknum senda forseta Íslands áskorun

Landlægur misskilningur nöldraranna

Nöldrararnir halda því fram að nú sé verið að steypa skattgreiðendum í skuldir með þessu.  En það virðast ekki margir skilja að ríkið fær lán og borgar vexti, en lánar svo peningana áfram og fær af því vaxtatekjur og kemur því út á núlli (í versta falli), og lántakinn er Seðlabankinn sem svo borgar vexti til ríkisins, en endurlánar til banka og annara aðila, sem svo á móti borga Seðlabankanum vexti.

Þeir sem því borga brúsann eru þeir sem taka lán á endanum og væntanlega nota peningana í eitthvað þarft, t.d. fjárfesta í verkefnum og eignum, og borga svo lánin sín til baka.

Þetta virðast sumir ekki skilja.  Sumir virðast halda að ríkið muni bara setja peningana í hvelfingar í Seðlabankanum og þar muni seðlabúntin rykfalla á meðan almenningur borgar vexti í formi skatta.

Meira að segja gæti maður haldið að nöldurskjóður á launum hjá HÍ tryðu þessu.  Alla vega er einn kverúlant með spjallþátt á RÚV sem trúir þessu.... sennilegast.

Nú er um að gera að láta ekki afturhaldsseggina og hræðsluáróðurinn stjórna ferðinni, heldur skynsemina og þorið.  VG hefur ekkert í umræðuna að gera, og þaðan af síður einhverjir aflóga prófessorar sem aldrei hafa stigið út fyrir bómullarhnoðra akademíunnar. 

Verkefnið að verja árangur undanfarinna ára