"Bönnum allt" kórinn kyrjar hærra

Vinstrimenn á Íslandi vilja, sem fyrr, banna allt sem ekki er sérstaklega leyft með tilskipun frá ráðherra.  Hluti af því er að banna allar virkjanir og orkufrekan iðnað af því að þeim finnst það einhvern veginn skynsamlegra að nýta EKKI auðlindir landsins og láta frekar "eitthvað annað" koma í staðinn.

Þetta "eitthvað annað" er aldrei útskýrt neitt nánar.  Nema þegar formaður vinstrisinnaðasta flokksins minnist á brugghús í Eyjafirði sem fínt "eitthvað annað", og er búinn að gleyma því að hann var alfarið á móti því að bjórinn yrði leyfður á sínum tíma (að leyfa bjór er soldið forsenda fyrir því að geta stofnað brugghús).

Þetta er hið besta mál, ef menn vilja virkja fyrir norðan og reisa þar álver, þá er það þeirra mál og ekkert nema gott um það að segja.  Þrátt fyrir að hinir móðursjúku vinstrimenn tali um að ímynd landsins sé í rúst og allt hvað eina, bara út af 2 álverum sem reist hafa verið og einni virkjun, þá er ekkert sem sannar þá fullyrðingu.

Hættum nú að hlusta á þessa vælukjóa sem vilja helst friða allt á landinu og láta íbúa þess lifa á fjallagrösum og lepja dauðann úr skel, allt í nafni þess að friða einhverjar lækjarsprænur og afdali - sem nóta bene yrðu ekki fyrir nema lágmarks raski.  Þangað til þetta fólk getur komið með önnur svör en "eitthvað annað", þá er ekkert mark á því takandi.  Hvort sem það titlar sig frægar söngkonur eða hausverkjahvetjandi álfahljómsveitir.

Nú þarf að skapa verðmæti, tryggja lífsviðurværi á landinu og hafna endanlega þessum "eitthvað annað" málflutningi vinstrapakksins. 

Viljayfirlýsing framlengd

Vinstri Grænir = Afturför og lífsgæðakúgun

Vinstri Hreyfingin Grænt Framboð (eins og leiðinlegri þingmenn þess flokks kalla samkundu sína undantekningalítið) er með þessu að kalla eftir algeru hruni hagkerfisins á Íslandi.  Sem er svo sem það sem þeir hafa boðað og kallað eftir undanfarna áratugi í margnefndum kommúnistaflokkum þeim sem landsins stækustu afturhaldsseggir hafa prýtt.

VHGF virðist ekki skilja hvernig hjól efnahagslífsins virka.  VHGF virðist halda að til sé einhver dularfull uppspretta auðs (frá auð-valdinu, væntanlega) sem á réttilega heima hjá öðrum en þeim sem skapa verðmæti í samfélaginu.

VHGF virðist vera á þeirri skoðun að auðlindir okkar skuli ekki nýta, því nýting þeirra getur haft í för með sér breytingu á þeim eða röskun. 

VHGF virðist, samkvæmt veikburða og veruleikafirrtum málflutningi kaffihúsakverúlantanna sem tala sífellt fyrir hönd þess flokks, vera alfarið á því að fólk sé miklu betur sett sveltandi úti í vegkanti, með öllu óheimilt að sjá sér farborða, en með ósnortna náttúru til að deyja í, frekar en að sýna stórhug og dug og sjá sér og sínum farborða með nýtingu þeirra auðlinda sem landið okkar prýða.

Ef fólk virkilega leggur við hlustir þegar VHGF byrjar grátkór sinn, þá komast menn fljótt að því að þeir eru búnir að eyða hverra einustu skattkrónu um það bil 12 sinnum með "tillögum" sínum.  Í huga hinna veruleikafirrtu VGHFista snýst réttlæti um að þjóðnýta allt og alla (enda er í þeirra huga engum treystandi til eins eða neins nema ríkið hafi fulla og algera umsjón með öllu okkar lífi), og "skynsemi" um að hreinlega banna alla nýtingu auðlinda.

Ég fagna hins vegar því þegar kjánaprikin í þessum hjákátlega flokki hefja sinn rammfalska forræðishyggjusöng.  Forsöngvarinn mótmælir harðlega lögleiðingu bjórs í fyrsta erindi lagsins, en notar svo bruggverksmiðju sem dæmi um frábæra einyrkjastarfsemi í erindi tvö.  Hinn laglausi hljómborðsleikari glamrar á gamlan skemmtara um það hversu dásamlegt það væri ef allt þetta viðbjóðslega bankamannapakk myndi verða rekið úr landi, þá yrðu sko allir glaðir.

Ég fagna því, vegna þess að við sjáum þá hvar vitleysismörkin liggja.  Þegar VHGF treður upp, þá vitum við um leið hver er heimskulegasta afstaða í hverju máli fyrir sig.  Og þar af leiðir getum við alltaf haldið umræðunni hægra megin við þennan núllpunkt sem VHGF færir okkur.  Jú, VHGF er Leoncie stjórnmálanna, sjálf sannfærð um eigið ágæti, en í huga flestra annara mælikvarði á botninn.

Þá væri ekki úr vegi að spyrja VHGF bandið hvað þau leggja til í staðinn fyrir eðlilega nýtingu auðlindanna?  Hvaðan eiga allir peningarnir að koma til að þjóðnýta þjóðfélagið og leggja af allt sem heitir einstaklingsfrelsi og einkaframtak?  Svörin sem hafa hingað til komið í viðlögum sveitarinnar eru "bara eitthvað annað" og "frá hinum ríku".  Gallinn er bara sá að "bara eitthvað annað" er doldið óljóst, og "hinir ríku" færa sig bara út úr landi ef þessi falska hljómsveit kemst í aðstöðu til að banna alla aðra tónlist nema sína eigin.

VG: Vilja bjarga Þjórsá

Froðusnakkur Samfylkingarinnar mættur í hús

Samfylkingin hefur löngum verið þekkt af öðru en yfirveguðum yfirlýsingum eða skynsömum pólitíkusum, og það er svo merkilegt að meira að segja í þessu máli (þegar hið ólíklega gerðist að Samfylkingarmaður tekur skynsamlega afstöðu) tekst þeim að klúðra hlutunum "stóran tíma."

Ég vona innilega að hætt verði við að byggja þetta leikfangahús fyrir læknana í Vatnsmýrinni.  Við ættum fyrst að reka lág- og miðtækni sjúkrahús af myndugleik áður en við förum að færa okkur út í hátækni hlutann.

En auðvitað gat maður reiknað með því að froðusnakkar í Samfylkingunni gætu klúðrað þessu.  Málið er nefnilega að Gunnar hefur nákvæmlega ekkert forræði í málinu, hann er bara wanna-be ráðherra sem vill sveifla ímynduðum veldissprota sínum af og til, svona til að minna á að kannski ætti almenningur að hætta að hlæja svona mikið að honum.  Og fetar þannig í fótspor Össurar, Ingibjargar, og Björgvins G.  Allt ráðherrar og fulltrúar Samfylkingarinnar sem gera álíka mikið gagn og svæsin fótsveppasýking.

Gunnar hefur ekkert forræði í þessu máli, þó hans skoðun sé vissulega rétt - það eigi að slá þessu fjandans sjúkrahúsi á frest og ekki sólunda almannafé í einhver gæluverkefni læknamafíunnar.

Guðlaugur Þór bregst við sem sannur Framsóknarmaður; víst skal spreða milljörðum af skattfé í eitthvað sem er ekki úthugsað, bara til að friða ólátabelgina í læknastéttinni.  Guðlaugur Þór kemur úr flokki sem eitt sinn, í gamla daga, lagði áherslu á að fara vel með skattfé, halda álögum í lágmarki... en nú er hann genginn í Framsóknarflokkinn, flokk sem hefur haft það að markmiði alla tíð að hygla flokksgæðingum og eyða almannafé (sem fólk eins og Sóley Tómasdóttir tala um sem ókeypis fjármagn).

Það væri vel þess virði að leita að leyfum Framsóknarflokksins á einhverju eyðibýlinu úti á landi, þar sem þessi flokkur á jú heima, og segja meðlimum þess flokks nákvæmlega hvað þeir geta gert við þetta sjúkrahús.

Frestun ekki inni í myndinni

Ósammála málstaðnum, en fagna framtakinu

Ég fagna framtakinu, gaman að fá þessar hljómsveitir/söngkonu sem fjöldi fólks finnst gaman að hlusta á (Guð má vita af hverju).

Þau eru náttúruverndarnöttarar, misskilja mikilvægi á nýtingu auðlindanna, en það geta ekki allir haft rétt fyrir sér, en þau berjast fyrir sínum skoðunum og vekja athygli á þeim á uppbyggilegan hátt, ólíkt skemmdarvörgunum sem hafa holað sér niður á hálendinu undanfarin ár.

Nýting auðlinda á Íslandi er nauðsynleg, við spörum heiminum mikla mengun með því að nýta okkar orkulindir frekar en að orkan sé unnin annars staðar í heiminum með mun meiri mengun.

Það einkennir reyndar málflutning öfgafullra náttúruverndarsinna; krafan um að það sé betra að mengun sé meiri annars staðar, en að við leggjum okkar á vogarskálarnar til að draga úr hnattrænni mengun.

Á einhvern hátt finnst þessu fólki betri framtíðarsýn að við verðum öll japlandi fjallagrös í lífrænum lopapeysum án rafmagns eða hitaveitu, náttúruvæn fram í fingurgóma en allslaus.

Verði ykkur að góðu í sumar þegar tónleikarnir eru og góða skemmtun. 

Ísland verði áfram númer eitt

Loksins laus við Hillary

Hillary hefði verið afar slæmur kostur demókrata, hún er fulltrúi gamalla lausna og hernaðarbrölts.  Engu að síður naut hún stuðnings femínista í Bandaríkjunum og víðar, sem ólmir vildu fá hana sem forseta... bara af því að hún er kona.

Það eitt og sér er mjög ógnvekjandi.  Femínistar eru tilbúnir að fórna allri skynsemi og elta þess í stað einn leiðtoga bara byggt á því hvernig hann á það til að stilla sig af við að pissa.

Hillary verður ekki varaforsetaefni Obama, það held ég að sé algerlega útilokað, en þeim mun líklegra að henni verði boðin staða í ríkisstjórninni annað hvort sem utanríkisráðherra eða heilbrigðisráðherra, og hún verður áberandi í kosningabaráttunni til stuðnings Obama.

Mitt gisk er að að John Edwards verði fyrir valinu hjá Obama, íbenholt og fílabein.

En við getum öll glaðst yfir því að Hillary laut í lægra haldi, heimurinn þarf ekki á öðrum George Bush að halda, þó í pilsi væri. 

Óskaði Obama til hamingju

Kerfiskallinn Vilhjálmur í sjálfsblekkingunni

Það er ótrúlegt, og væri í raun hlægilegt ef ekki svona sorglegt, að sjá Vilhjálm göslast áfram í þessar sjálfsblekkingu sinni. 

Heldur hann í alvöru að það fyrirfinnist sú hræða á byggðu bóli sem gæti hugsað sér að fá hann sem borgarstjóra?  Það er meira að segja alger spurning hvort hann væri betri en núverandi borgarstjóri sem er viðlíka vel liðinn og gyllinæð og ámóta hæfur í starfi og hörpudiskur að skrifa skáldsögu.

Af hverju þarf Vilhjálmur að tala um þetta eins og um sé að ræða einhvera sjálfstæða ákvörðun óháða honum?  Að "einhverjir" séu að færast nær ákvörðun?  Vilhjálmur, ef hann hefði snefil af sómatilfinningu, ætti fyrir lifandi löngu að vera búinn að afsala sér þessu.

Það hefur aldrei, ég fullyrði það, aldrei verið jafnóhæfur stjórnmálamaður við völd á Íslandi, og af nógum mörgum er að taka.  Vilhjálmur kemur af og til klökkur fram og talar um hvað þetta sé ósanngjarnt, hann hafi unnið svo vel í þágu borgarinnar alla sína tíð.  

Já er það, Vilhjálmur?  Ég veit ekki betur en að þú hafir eytt 16 árum af þínum ferli í minnihluta þar sem R-listinn fékk drjúgan tíma til að leggja fjárhag og ímynd borgarinnar í rúst.  Er það þitt góða starf?  

Mér er alveg nákvæmlega sama hvað þú hefur gert í gegnum tíðina fyrir íþróttafélög eða félagasamtök sem hafa þurft fyrirgreiðslu.  Þú hefur EKKI staðið vörð um hagsmuni kjósenda (og hagsmunir kjósenda eru klárlega þeir að vinstrimenn fái ekki að stjórna), og eina sem þú afrekaðir var að gera ísskáp útlægan úr miðborginni.

Ég, og aðrir Sjálfstæðismenn, krefjumst þess að þú skríðir aftur undir steininn þaðan sem þú komst, og látir aldrei sjá þig aftur meðal siðaðs fólks.  Þín mun ætíð verða minnst sem mesta skúrksins í sögu Sjálfstæðisflokksins, mannsins sem eyðilagði flokkinn í borginni í heila kynslóð. 

Þrýsta fastar á Vilhjálm

Hinir ótryggðu eiga ekki rétt á "bótum"

Að sjálfsögðu er þetta hið versta mál fyrir þá sem urðu fyrir tjóni en sem betur fer eru flestir tryggðir fyrir svona tjóni.

Nú vaknar spurningin hvað verður um þá sem eru ekki tryggðir.  Flestir eyða hluta tekna sinna í að borga iðgjöld af tryggingum einmitt til að fá bætt tjón sem þetta, en einhverjir ákveða að spara sér þennan iðgjaldakostnað - vera ótryggðir - og láta kylfu ráða kasti.

Mér finnst alltaf út í hött að heyra "kröfur" fólks sem lendir í tjóni um að fá bætur þegar það hefur ekki verið með tryggingar í lagi.  Eitt er að lenda í því að tryggingarfélögin reyni að snúa sig út úr hlutunum (og fólk þar með fórnarlamb blekkinga) en annað þegar fólk einfaldlega ákveður að vera ótryggt og svo heimta að almenningur bæti þeim tjón sem kann að vera.

Ég vona að allir þeir sem voru tryggðir fyrir tjóninu fái allt sitt veraldlega tjón bætt hjá þeim aðilum sem sáu um tryggingarnar, en líka að þeir sem höfðu engar tryggingar átti sig á því að þeir eiga enga heimtingu á að fá neitt frá neinum.

Þú tryggir ekki eftir á, og flestir fara eftir þeirri góðu reglu. 

Mjög margar tilkynningar um tjón

Algerlega tilgangslaus frétt

Og hvað?  Af hverju ætti manni ekki að vera nákvæmlega sama?

Er þetta frétt af því að þarna var þingmaður?

Best finnst mér þessi hugleiðing hans í lokin um skaðsemi áfengis.  

Jedúdda mía, mikið væri gaman ef blaðamenn myndu hafna svona "fréttaskotum" fræga fólksins um sjálft sig. 

Flugdólgur í vél með íslenskum þingmanni

Af hverju fresta þessu?

Til hvers í ósköpunum þarf að láta þetta eftir stjórnarandstöðunni?  Framsókn og kommarnir hafa nákvæmlega engin gild rök til að vera á móti þessu, en flýja þess í stað í daunilla afkima útúrsnúninga og rangfærlsna.  Þeir eru svo sem á heimavelli þar, flokkarnir.

Frumvarp þetta snýst um að greina á milli þess hver veitir þjónustuna og hver veitir hana, þannig að sá sem veitir hana sé að gera það á sem besta verðinu og veiti jafnframt bestu þjónustuna.  Hingað til (lesist; undir mosagrónum og flór-út-ötuðum járnhæl Framsóknar) hefur þetta verið algerlega bannað, Framsókn gafst upp á því að skilja heilbrigðiskerfið um það leyti sem menn fóru að hætta að nota blóðtöku sem lækningaaðferð.  Og svo auðvitað af alkunnri snilld sinni var tekin ákvörðun um það að fyrst mannvitsbrekkurnar í Framsókn skildu þetta ekki, þá mætti aldrei neinn annar gera tilraun til að skilja þetta.

Framsókn er á móti þessu því þeir vita upp á sig skömmina.  Siv, Palli Pedersen, og hvað þau nú heita öll sem voru í þessu embætti voru vita vonlaus og álíka vel starfi sínu vaxin og mosagróður til að stýra olíuflutningaskipi, og nú skal komið í veg fyrir að þjóðin komist að því hversu mörgum milljarðatugum þetta Framsóknarlið sóaði í krafti eigin dugleysis.

Vinstri Grænir eru á móti, því þeir eru bara alltaf á móti.  Það er ekkert nýtt.  Jón Bjarnason vill ekki leyfa sölu á ódýru kjöti sem framleitt er þar sem aðstæður eru betri og þar sem gæði eru meiri, því útlenskt kjöt er víst bráðdrepandi.  Og hann vitnar í einhver búnaðarsambönd norður í landi máli sínu til stuðnings og talar um "andstöðu fólksins í landinu".  Ögmundur er auðvitað bara úti að aka, eins og svo oft áður, og óskar þess heitast að við færumst aftur til miðalda með tilheyrandi lénsfyrirkomulagi.

Ég spyr, hins vegar, af hverju í ósköpunum þarf að láta þessa hluti eftir hinni handónýtu og sauðvitlausu stjórnarandstöðu?  Af hverju að leyfa þessu liði sem situr í minnihluta að rífa sig og rugla í hlutunum, og bakka svo með mál sem skipta þjóðina gríðarlega miklu?

Auðvitað á bara að rúlla yfir minnihlutann ef hann er með svona stæla. 

Rætt um sjúkratryggingar á Alþingi

"Sell-out" hópurinn kemur aftur saman

Sturla "sell-out" Jónsson lætur aftur á sér kræla, maðurinn sem mótmælir háu bensínverði en auglýsir svo fyrir N1, maðurinn sem hótar aðgerðum á mánudegi, en er svo bara að auglýsa tölvur og allt í plati.

Athyglissýki hrjáir þessa menn ekki síður en veruleikafirring.  Besta líkingin sem ég hef komið með á þessum lýð er að þeir haga sér eins og smákrakkar á sykurtrippi í dótabúð í desember.  Þeir fá skapofsaköst af því að þeir fá ekki það sem þeir vilja, hversu heimskulegar sem kröfur þeirra í raun eru.  Þetta eru menn, að því er virðist, sem hafa tekið rangar ákvarðanir sjálfir á tímum góðæris og sitja nú uppi með vandamál sem þeir sjálfir, eins og við öll hin, verðum að leysa.  

En nei, Sturla kennir ríkisstjórninni um og ætlast til þess að hið opinbera beili hann út úr því klúðri sem hann sjálfur er búinn að koma sér í.

Og vill svo í ofanálag fá opinbera heimild til að keyra eins og honum sýnis, dauðþreyttur, á þjóðvegum landsins og stofna lífi og limum annara ferðalanga í hættu.  Bara af því að honum finnst það.

Sturla er lýðskrumari, hann virðist ekki hafa snefil af sómakennd (ef marka má það hversu ötull hann er að auglýsa vörur og þjónustu í krafti nýfenginnar frægðar), og virðist ekki skilja hvað einstaklingsábyrgð er. 

Fyrst og fremst táknræn athöfn