Gallinn við svona framkvæmd

Er sá að þegar kosið er um tiltekið og afmarkað málefni, oft á tíðum mál sem velflestum er sama um, þá muni þrýstihópar, fámennir en háværir klúbbar, fá sínu framgengt þvert á almannahagsmuni.

Nú spái ég lítið í þessum vegi, ég á líklegast eftir nota hann kannski 2x um ævina, og er í raun slétt sama um hann.  Hins vegar eru svona útnáravegir oft á tíðum slysagildrur, og ég vel á fjögurra ára fresti fulltrúa til að sjá um þessa hluti fyrir mig, aðila hvers dómgreind ég treysti (umdeilanlegt eins og það nú er eftir á að hyggja), svo ég þurfi ekki að setja mig inn í hvert einasta smámál sem upp kemur og einhver sér ástæðu til að mótmæla og fjargviðrast út af.

Landvernd ásamt Náttúrverndarsamtökum Íslands (einkaklúbbi Árna Finnssonar), eru dæmi um fámenna þrýstihópa sem einhverra hluta vegna hafa svo til óheftan aðgang að fjölmiðlum og virka því mun stærri en þeir í raun eru.  Og bara af því að handfylli af náttúrverndarsinnum finnst ómögulegt að raska náttúrunni almennt (þessir aðilar eru sífellt á móti öllu sem getur haft áhrif á náttúruna, það er að segja ef það runnið undan rifjum "hægrimanna", sem Árna er sérstaklega í nöp við).

Útkoman úr kosningunni verður eflaust afgerandi, þeir sem taka þátt verða flestir á móti því að ráðist verði í nokkrar framkvæmdir á svæðinu, og Landvernd og Árni eiga eftir að mæta glaðhlakkalegir í fjölmiðla og fullyrða að "þjóðin hafi talað".  Þegar í raun og sann þjóðin segir lítið því henni er alveg sama, en einstaka fótgönguliðar í herdeildum samtaka á borð við Landvernd fara í allar tölvur sem þeir komast í til að greiða atkvæði.

Landvernd og Árni eru ekki meiri talsmenn þjóðarinnar en trukkabílstjórarnir.

Svona í ljósi þess að Árni sagði í viðtali um daginn að þeir sem ekki eru honum sammála um útfærslu á náttúruvernd séu hægrimenn og til einskis nýtir, þá væri ekki úr vegi að spyrja Árna hvaða skoðun hann hefur á því að hans fólk (sem ég reikna með að sé vinstrisinnaðara en sjálfur Lenín) vilji útrýma skóglendi á Hólmsheiði svo hægt sé að setja flugvöll á þann stað í borginni þar sem aðstæður til flugs eru hvað verstar.  Eða getur verið að helstu talsmenn náttúrverndar sjái eingöngu til efni til að verja náttúru gegn ágangi "hægrimanna" en ágangur vinstrimanna sé eðlileg framþróun þjóðinni til heilla?

Bara spyr

Almenningur segi álit sitt á Gjábakkavegi

Þýðing:

Mér finnst ósanngjarnt að við skulum ekki fá að brjóta lög í friði fyrir löggunni.  Það er ótrúlegt að löggan skuli taka á þeim sem brjóta lögin, í stað þess að leyfa þeim að gera svo eftir behag.

Við berjumst fyrir rétti allra þegna, það er réttur allra þegna að fá að keyra vörubíl ótakmarkað og án hvíldar.

Ég mætti með kylfu að vopni til að sýna mínum mönnum samstöðu, ég átti ekki bíl á Kirkjusandi, mætti bara með kylfu.  Það er ótrúlegt að löggan skuli hafa tekið hana af mér.  Og að hún hafi svo ekki viljað láta mig fá hana til baka!

Jújú, ég réðist á lögguna... sorrí og allt það, en að löggan skuli síðan ráðast á MIG eftir að ég hafði snúið drenginn niður, er ótrúlegt ofbeldi af hennar hálfu.

Við búum í lögregluríki þar sem maður má ekki lengur brjóta lög að vild eins og í siðmenntuðu ríki, þar sem maður má ekki lengur ganga um vopnaður og ógnandi í friði fyrir lögreglumönnum sem hirða af manni vopnin, og maður má ekki lengur lemja lögregluþjóna án þess að þeir bregðist við og taki á manni á móti, og kæri mann svo.  Hvað varð um frelsið?  Hvenær urðum við að þessu fasistaríki þar sem vopnaburður á almannafæri er illa séður?  Þar sem maður má ekki lengur ógna öðrum?  Þar sem löggan er yfir það hafin að láta lemja sig?  Jónas Kristjánsson, getur þú kannski svarað því?

Missti stjórn á skapi sínu

Inconvenient truth?

Þetta getur varla verið nokkuð sem umhverfis-sértrúarsöfnuðirnir vilja að staldra sé við. 

Þórunn hefur ekki vílað fyrir sér að fara með rangt mál þegar hún ræðir um mengun og losun álveranna á Íslandi.  Sjálfur Messías umhverfiskirkjunnar, Al Gore, er með svo margar beinagrindur í skáp sínum, að honum dugar ekkert minna en heilt fataherbergi til að rúma þær allar.  Hann sjálfur stundar ansi ó-umhverfisvænan lífstíl, hann á stóran hlut í hinum og þessum fyrirtækjum sem hann kallar "græn" og hvetur menn óspart til að fjárfesta í þeim, án þess að þetta þess að hann á sjálfur fjárhagslegra hagsmuna að gæta í téðum fyrirtækjum.

Þá er ekki staldrað við þá staðreynd að stór hluti af fullyrðingum sértrúarsafnaðanna eru ósannaðar með öllu, og í raun ekkert annað en dylgjur og áróður.

Nú bætist þetta við.  Mengun minnkar frá álverum, sem gengur þvert á áróður hinna heittrúðu.  Gera má fastlega ráð fyrir því að þessum niðurstöðum verði stungið ofan í lífrænt ræktaða hliðartösku safnaðarins og þeir fordæmdir og útskúfaðir sem voga sér að minnast á þær.

Minni mengun frá álverum

Sturla nýtir sér frægðina

Gaman að sjá að Sturla Jónsson, trukkari, skuli gefa sér tíma frá því að mótmæla háu bensínverði og auglýsa sama háa bensín fyrir N1.

http://visir.is/article/20080426/LIFID01/243269982

Sturla er alveg samt á móti háu bensínverði, en bara þeim hluta háa bensínverðsins sem ríkið innheimtir.  Sá hluti sem N1 innheimtir er bara fínn og hann sér ekkert athugavert við að auglýsa fyrir það fyrirtæki.

Hann er nú líka orðinn svo frægur, kallinn.  Hálfgert selebrití.  Hann kemur örugglega í Séð og Heyrt bráðum "Sturla í góðum gír" og mynd af honum brosandi í Leónardódíkapríó stellingu ofan á stýrishúsi bílsins síns.

Látum okkur nú sjá... hann mótmælti háu bensínverði og kenndi ríkisstjórninni um.  Svo þegar í ljós kom að ríkisstjórnin stjórnar ekki bensínverðinu, og hefur meira að segja lækkað álögur sínar talsvert og meira en gerist og gengur í löndunum kringum okkur, þá er það fyrsta sem hann gerir að hringja í N1 og leika í auglýsingu fyrir olíufyrirtæki?

"Ég er í stríði við ríkisstjórnina, baráttan beinist gegn þeim". Nú?  Ég hélt að baráttan bitnaði helst á saklausum borgurum og lögregluþjónum sem fá greitt fyrir að halda uppi lögum og reglu í þjóðfélaginu.

Annars er maður búinn að missa töluna á þeim kostulegu ummælum sem Sturla, og fleiri, hafa látið frá sér fara undanfarnar vikur, þessir menn vaða nú ekkert í vitinu verður maður að viðurkenna.  Vonandi hafa þeir áttað sig á því að þeirra stuðningur kemur úr herbúðum drukkinna unglinga, gagnfræðaskólakrakkar gera að þeim grín með því að apa eftir þeim vitleysuna, og almenningur í landinu hlær dátt að uppátækjum þessara manna.  Þá er spurningin, hversu klár þarftu að vera til að skilja þau skilaboð?

Norðurlandamót í rangfærslum og dramatík

Vinstri Grænir hafa verið iðnir við að setja hvert metið á fætur öðru í rangfærslum og dramatík, og má segja að dramadrottningin sjálf, Svandís Svavarsdóttir, hafi náð að toppa sjálfa sig í pöpulismanum í þessu máli.

Hinn stórglæsilegi sparkvöllur sem er á bak við húsið mun vonandi hverfa, enda skilst mér að síðasta grasstráið hafi horfið þaðan árið 1999, og er nú þarna moldarflag og mörk með rifnum netum.  Börn í Þingholtunum neyðast víst héðan í frá að notast við Hljómskálagarðinn, eða skólalóðir til að stunda knattspyrnu, og þurfa að láta yfir sig ganga að hafa gras undir fótum en ekki mold, og mörk sem hafa heil net. 

Það er líka skelfilegt, að mati Vinstri Grænna, að hús í miðborginni skuli hafna í höndum "einka"aðila, þeir gætu tekið upp á því að gera þau glæsileg og jafnvel (sé ósvífnin þeim mun meiri) gera þau að bæjarprýði.  En slíkt er víst sérstaklega bundið við hina hötuðu "auðmenn" sem eru eitur í beinum vinstrisinnaðra stjórnmálamanna um þessar mundir.

Já, því miður verður Svandís að sætta sig við það að hún fær ekki alltaf að ráða.  Og þessir 5 sem mættu á stofnfund "Hollvina Hallargarðsins" eða hvað sem sá söfnuður var kallaður, verða að sætta sig við það líka.  Hinir landsmenn sem vilja að húsið, sem hefur verið í niðurníðslu í stjórnartíð flokksmanna Svandísar og Sigrúnar Elsu, dafni og endurheimti fyrri glæsileika, fögnum.  Megi fleiri hús í bænum okkar "lenda í höndum" einkaaðila sem dirfast að sýna þá ósvífni að hugsa vel um þau.

Kauptilboði Novator tekið

Starfsdagur í menntaskólum?

Gat nú verið að botnfall íslenskra ungmenna tæki sig til og mótmælti, svona bara til að vera með.

Protest is the new black!

Er nokkuð því til fyrirstöðu að handtaka þessa krakkaorma, þau eru jú að brjóta lög?  Mér finnst alveg nóg komið af því að sýna "mótmælendum" linkind, hvort sem það eru skemmdarverkamenn uppi á fjöllum að eyðileggja vinnuvélar, eða trukkarar að berja lögguna við Rauðavatn.  Hér á landi eru í gildi lög, lögreglan á að tryggja að eftir þeim sé farið, lögreglan á líka að handtaka þá sem fara ekki eftir þeim.  Krakkar, trukkarar, innfluttir atvinnunáttúruverndarsinnar.... allir eiga að vera jafnir fyrir lögum, og einhverjum háværum væluskjóðum á ekki að leyfast að brjóta lög sem við hin förum eftir.

Ungmenni tefja umferð

Kæmi ekki á óvart

Það kæmi ekki á óvart ef margt misjafnt liti dagsins ljós eftir langa setu vinstriflokkanna í bæjarstjórn, enda vinstriöflin þekkt af allt öðru en skynsemi í fjármálum.  Það er ábyrgðarhlutur að halda um veski hins opinbera, og í gegnum tíðina höfum við séð trekk í trekk að Alþýðubandalagsmenn og Kratar (að ógleymdum Framsóknarmönnum) eru hrifnari af því að framkvæma fyrst og hugsa svo, eða oftar en ekki; framkvæma fyrst, hrökklast svo frá völdum, láta Sjálfstæðisflokkinn leysa úr vitleysunni, og kvarta allan tímann.

Við sjáum glöggt dæmi um þetta í aðkomu Samfylkingarinnar og Vinstri Grænna að Orkuveitumálinu og REI, þar sem fulltrúar þeirra flokka voru, og eru, harðir stuðningsmenn þess að taka skattfé Reykvíkinga (og Akurnesinga og Borgnesinga) og fjárfesta í áhættusömum verkefnum í svörtustu Afríku.  

Staðreyndir málsins eru einfaldar, aldrei treysta vinstrivæng stjórnmálanna fyrir opinberum fjármálum. 

Vill taka fjármál Bolungarvíkur föstum tökum

Sjálfstæðisflokkur og Samfylking fagna hugmyndum um skattahækkanir

Þessi hugmynd er góð, innan ákveðinna marka.  Ef við höfum til dæmis ríkisstjórn sem rekur hið opinbera af ráðdeild og skynsemi, og hefur þar af leiðandi mikinn rekstrarafgang, þá á hin sama ríkisstjórn að byggja upp sjóð sem þennan, en ekki eyða afganginum í hluti eins og "Ár Kartöflunnar" eða það að hola niður Jafnréttisráðum og -fulltrúum í um allar koppagrundir.

Ef svona sjóð á að stofna með því að hækka álögur á landsmenn, þá ber að berjast gegn þessu með oddi og egg, skattar á Íslandi eru alltof háir, jaðarskattar yfirþyrmandi, og yfirbygging hins opinbera komin út í tóma vitleysu.

Ef vel á að vera ætti að lækka skatta á allar tekjur, afnema innflutningsgjöld og stórefla aðhald í útgjöldum hins opinbera.  Það má gera með því t.d. að taka upp einkarekstur í menntakerfinu og heilbrigðiskerfinu í mun meiri mæli en nú er gert, taka upp miklu öflugara eftirlit í bótakerfinu og útrýma svikurunum sem þar fá að ríða röftum, og með því að laða að erlenda fjárfestingu til landsins.

En því miður virðist sem svo að Sjálfstæðisflokkurinn, sem hefur komið sér kyrfilega fyrir á vinstrihluta miðjunnar í íslenskum stjórnmálum, fagni tækifæri til að hækka skatta og leggja sérstakar álögur á landsmenn, og þannig koma sér undan því að sýna ábyrgð og aðhald í rekstri hins opinbera.

Það er miður.  Því þetta er í sjálfu sér ekki vitlaus hugmynd hjá Björgólfi (þó svo að hann virðist gleyma þeirri staðreynd að olíusjóður Norðmanna er þeirra lífeyrissjóður, á meðan við höfum lífeyrissjóði sem eru ígildi sparnaðar þjóðarinnar, og sem slíkir einstakir í heiminum), en útfærslan á henni í höndum vinstrisinnaðra stjórnmálamanna í Sjálfstæðisflokki og Samfylkingu væri ávísun á stórslys.

 

Vilja skoða hugmynd um þjóðarsjóð

Lára hlutlausa?

Er einhver sem getur haldið því fram, án þess að brosa, að Lára sé "hlutlaus" sem fréttamaður?  Man einhver eftir "fréttum" hennar af Kárahnjúkavirkjun?  Hlutlaus?  Varla.

Yfirlýsing frá Láru Ómarsdóttur

Talsmaðurinn kannast ekki við talsmanninn

Talaði Sturla ekki um samstöðu trukkara í gær?  Eða er sú samstaða eins og kröfugerð trukkaranna, breytanleg frá degi til dags, og gegnumsneytt án samhengis?

Var þessi sem gaggaði eins og hæna framan í lögguna ekki talsmaður þeirra um daginn?  Alla vega hefur hann komið fram í nafni trukkaranna... en Sturla barasta þekkir hann ekki neitt.  Sá þetta ekki einu sinni. 

Best var samt þegar Sturla sagði í sjónvarpinu: "Löggan ræðst bara á hann, og hann er nýkominn úr aðgerð á hné.... en ég þekki hann samt ekki neitt...."

Trukkarar hafa nákvæmlega enga samúð, þvert á móti er þjóðin búin að fá upp í kok af heimtufrekjunni og klárlega er komin fram krafa um að yfirvöld koma á röð og reglu og hleypi ekki svona vitleysingum lengra með barnalæti sín.

Sturla: „Ekki á okkar ábyrgð"