Skoðanaleysisstjórnmál Samfylkingarinnar bíða skipbrot

Það er aðeins ein ástæða fyrir þessu afhroði Samfylkingarinnar; einörð skoðanaleysisstefna hennar í öllum málum.  Samfylkingin tekur aldrei afstöðu í neinu máli, og það róttækasta sem sá flokkur gerir er að skipa nefndir.  Samfylkingin stendur fyrir lítið í íslenskum stjórnmálum, sem vekur upp gremju þeirra sem hana kusu síðast í ljósi digurbarkalegra yfirlýsinga forsprakka flokksins.

Ástæðan fyrir því að Sjálfstæðisflokkurinn hrynur ekki líka er einfaldlega sú að þó svo að Geir og Árni séu arfavondir stjórnmálamenn, þá er einfaldlega ekkert annað í boði í dag.  Sjálfstæðisflokkurinn er lélegur og tvístígur á miðju íslenskra stjórnmála og reynir að vera öllum allt, en skynsamir kjósendur hafa einfaldlega ekkert val.

Ef þú kýst Samfylkinguna, ertu að kjósa ráðleysi og skoðanaleysi, þá geturðu allt eins bara kosið Sjálfstæðisflokkinn, þú veist að hann fer alla vega ekki lengra til vinstri en hann er í dag.

Ef þú kýst Vinstri Græna ertu að kalla yfir þig myrkar miðaldir kommúnismans, skattpíningu, miðstýringu, þjóðnýtingu og fjárhagslegt sem og hugmyndafræðilegt gjaldþrot Íslands.

Ef þú kýst Framsókn ertu að kjósa sama gamla bændaflokkinn sem ól af sér menn eins og Björn Inga og Guðna Ágústsson, meira þarf ekki að segja.

Ef þú kýst Frjálslynda ertu týpa sem hefur áhuga á kvótakerfinu, hlustar á Útvarp Sögu og hefur skoðun á handboltaferli Jónínu Ben.  Þú getur allt eins bara stimplaði þig sem lúser strax.

Ergó, Sjálfstæðisflokkurinn heldur velli og á líklegast eftir að styrkjast, því allt annað sem er í boði er eins og lélegt álegg komið langt fram yfir síðasta söludag.

Fylgi við Samfylkingu og ríkisstjórn minnkar

Íslandsmeistaramót í gífuryrðum og upphrópunum

Forkólfar verkalýðsfélaganna keppast í dag við að slá um sig með stórum orðum og útúrsnúningum.  Ögmundur og aðrir horfa með löngunaraugum til þess tíma þegar allir höfðu það jafnskítt, og fordæma að nú skuli allir hafa það miklu betra, en sumir betra en aðrir.  Betra er að allir hafi það ömurlegt en að allir hafi það gott, þó misgott.

Það er ótrúlegt hvernig sumir geta talið sjálfum sér trú um að hér hafi aldrei verið stéttaskipting eða að hér hafi einu sinni allir verið jafnir.  Hér á landi hefur alltaf verið stéttaskipting, það er bara fyrst núna sem fólk er farið að viðurkenna það.

Ég sé ekkert rangt eða óeðlilegt við það að þeir sem leggi hart að sér uppskeri eins og þeir hafa til sáð, og þaðan af síður sé ég neitt óeðlilegt við það að þeir sem ekki nenna t.d. að mennta sig eða leggja á sig vinnu, skuli þurfa að fara á mis við munaðinn í lífinu.

Á Íslandi eru nefnilega sárafáir fátækirk, en ansi margir blankir; Ögmundur og félagar gera engan greinarmun á þessu.

Eru það sjálfsögðu mannréttindi að eiga bíl, tjaldhýsi, geta farið í utanlandsferðir, átt GSM síma, verið með áskrift að stöð 2?  Fjölmargir þeirra sem ég heyri barma sér hvað mest og hæst er einmitt fólk sem á ekki pening, ekki vegna þess að það sé fátækt, heldur vegna þess að það hefur tilhneygingu til að sanka að sér hlutum sem það hefur engin not fyrir og hefur ekki efni á.

Fjöldinn allur af fólki í dag er í erfiðleikum; það getur ekki borgað af nýju eldhúsinnréttingunni, tjaldvagninum, VISA kortið er að sliga það, nýi jeppinn eyðir svo miklu og er svo dýr í rekstri... þessu fólki vill Ögmundur að ríkið hjálpi.  Blanka fólkinu. 

Kannski ef fólk hætti að væla og færi að leggja á sig vinnu og sýna skynsemi, þá hefðu miklu fleiri það miklu betra, þá væru kannski færri blankir.

Formaður SFR: Splundruð þjóð

BSRB í boði Vinstri Grænna

Það er hverjum ljóst, hvort sem menn viðurkenna eður ei, að BSRB er skuggaráðuneyti Vinstri Grænna, og hverjum þeim félagsmanni sem er í félaginu er skylt að greiða til málpípu vinstrisinna.  Ef þú ert meðlimur í BSRB þá borgar þú fyrir málflutning Vinstri Grænna, hvort sem þér líkar betur eða verr, og sama hvar í flokki þú stendur.

Stjórnmálaflokkur hefur tekið verkalýðsfélag í gíslingu, sem er svo sem ekki ný frétt.

Hver man ekki eftir því t.d. þegar hinn "óháði" formaður BSRB mótmælti harðlega, fyrir hönd verkalýðsfélagsins, að hér skyldu sett vatnalög í fyrra, og mætti svo síðar sama dag og flutti sömu ræðuna sem þingmaður Vinstri Grænna?

Vandinn er vissulega heimatilbúinn að nokkru leyti, en má þó rekja eingöngu til þess að vinstristefna hefur fengið að grassera of lengi í stjórn landsmála, fyrst hjá Framsókn og síðar hjá Samfylkingu, og Sjálfstæðisflokkurinn hefur einfaldlega ekki spyrnt á móti.

Skattar hafa ekki verið lækkaðir nægjanlega, þannig að við sitjum uppi með ríkissjóð, skuldlausan, og stjórnmálamenn sem vilja fyrir alla muni moka peningum út frekar en að skila þeim til eigenda sinna.

Tökum sem dæmi: Samið var við kennara um 25% launahækkun á einu ári, hvað gerir það til að lækka verðbólguna?  Kristján Möller ætlar að stækka flugbrautina fyrir norðan og sprengja göng, í miðjum kröfukór um aðhald, Vegagerðin greinir stolt frá því að aldrei hafi fleiri göng verið í undirbúningi en akkúrat núna, Ingibjörg Sólrún eyðir milljónahundruð í að komast í Öryggisráð SÞ, til þess eins að geta tvöfaldað kostnað við utanríkisþjónustuna.

Já, þetta er heimatilbúið, og þetta angar af byggðastefnu (sem er hreinræktuð vinstristefna) og tilgerðapólitík, sem er aðalsmerki Samfylkingarinnar.  Og Sjálfstæðisflokkurinn spyrnir ekki á móti.

Ef mönnum er alvara með að ríkið bregðist við núverandi aðstæðum er eftirfarandi tilvalið:

Lækkum skatta, ríkið eyðir hvort eð er peningunum og enginn munur á verðbólguþrýsting hver eyðir peningunum, en skattgreiðendur myndu kannski einhverjir nota auknar ráðstöfunartekjur til að borga niður sínar eigin skuldir.  Til hvers á ríkið að taka til sín fúlgur fjár sem það hefur engin not fyrir, enda skuldlaust, og fjármagna vitleysu eins og Ár Kartöflunnar, þegar almenningur gæti vel nýtt peningana í eitthvað viturlegra.

Gerum gangskör í einkarekstri, og spörum þannig útgjöld ríkissjóðs.  Fáum fagaðila í rekstri til að sjá um sjúkrahúsin og skólana.

Afnemum lög um aðstoðarmenn þingmanna.  Hversu margir gera sér grein fyrir því að Vinstri Grænir greiddu atkvæði á móti frumvarpinu um aðstoðarmenn, en þegar það varð að lögum hafa þingmenn þess flokks ráðið helming þeirra sem ráðnir hafa verið?  Sóun á almannafé.

Vinstri Grænir geta nöldrað eins og þeir vilja, hvort sem er í gegnum þingflokkinn eða verkalýðshreyfinguna, en þeir virðast ekki skilja vandann, og boða lausnir sem eru ekkert annað en enn meira af sama ruglinu sem Samfylkingin og Framsókn hafa matreitt. 

Er til of mikils ætlast að Sjálfstæðisflokkurinn taki aftur upp merki hægristefnu og skynsemi, og segi hingað og ekki lengra við sósíalistana?

BSRB: Vandinn heimatilbúinn

Og til hvers ætti að ræða ESB?

Það er ekki eins og það þjóni hagsmunum Íslands að vera í ESB.

Ef menn geta horft framhjá fullyrðingum Eiríks Bergmanns, aðdáanda ESB #1, þá rennur upp fyrir fólki að það hefur enginn getað sett fram nein RÖK fyrir því að Ísland gangi í ESB.  Þegar gengið er á meðlimi ESB sértrúarsafnaðarins, þá byrja þeir auðvitað á sama söngnum, en að baki honum er ekkert annað en taugaveiklun og undarlega freudískur vilji til að afsala sér allri ábyrgð á sjálfum sér.

"Ef við göngum í ESB lækkar matvælaverð um marga tugi prósenta!" er algeng mantra ESB sinna.  Er það virkilega svo?  Af hverju ætti matvælaverð að lækka?  Jú, af því að tollar innan ESB eru svo miklu lægri og hagstæðari neytendum en hér á Íslandi.  Einmitt það, og síðan hvenær ráðum við ekki sjálf hvaða tollar og aðflutningsgjöld eru í gildi á Íslandi?  Ef á annað borð er vilji til að hafa lægri tolla og slíkt, af hverju ekki bara að lækka það sjálf, í stað þess að ganga í ESB og láta sambandið lækka það fyrir okkur?  Þetta er soldið eins og að ákveða að flytja til að komast í hreina íbúð, í stað þess einfaldlega að taka til.

"Ef við göngum í ESB fáum við evruna og svo miklu lægri vexti, og þá þurfa heimilin í landinu ekki að sligast undan háum vöxtum!" er annað vinsælt, sérstaklega nú um stundir.  Jahá... vissulega eru vextir lægri á evrusvæðinu, en fyrir því eru ástæður.  Háir vextir eru við lýði þegar mikill verðbólguþrýstingur er í hagkerfi, og verðbólguþrýstingur stafar af miklum hagvexti (yfirleitt).  Þessir aðilar gleyma (nú eða sleppa viljandi) að minnast á að vaxtastig hverju sinni er stýritæki seðlabanka.  Háir vextir eiga að LETJA eyðslu og HVETJA til sparnaðar, lágir vextir að HVETJA til eyðslu og LETJA sparnað.  Vextir eru verðmiði á peninga, og ef peningar eru dýrir ætti fólk frekar að selja peninga en kaupa (þ.e.a.s. spara frekar en fá lánað).  Hvar eru þrýstihópar sparifjáreigenda sem fagna háum vöxtum á Íslandi og 15% áhættulausum vöxtum á ári?  Vill þetta fólk hoppa yfir í evruna og fá 5% ávöxtun á sparifé sitt?

"Ef við göngum í ESB megum við gera ráð fyrir ca. 8% atvinnuleysi að jafnaði!" Er nokkuð sem heyrist líka oft.... nei, bíðið við, það heyrist aldrei.  En er engu að síður satt.  Innan ESB er mismikið atvinnuleysi, en að jafnaði 8% (t.d. í V-Evrópu).  Það jafngildir að um 16.000 vinnufærir einstaklingar væru án atvinnu hverju sinni á Íslandi.  Staðreynd.  Nema menn vilji trúa því sem leiðtogar sértrúarsafnaðarins hafa sagt, og að hér gildi einfaldlega ekki sömu hagfræðilögmál og annars staðar.

Lönd sem ganga vilja inn í Evrópska Myntbandalagið þurfa að halda fjárlagahalla innan ákveðinna marka, sem og verðbólgu (auk annars).  Ef vaxtaákvörðunarvaldið er fært út úr hagkerfinu til Brussel, þá hafa stjórnvöld bara eitt tæki til að halda verðbólgu niðri (og takist það ekki yrði landinu sparkað úr myntbandalaginu), og það er að stýra í gegnum atvinnuleysi.  Hætta framkvæmdum og gera verktaka atvinnulausa, draga úr heilbrigðisþjónustu og gera hjúkkur og sjúkraliða atvinnulaus. 

Jújú, í dag eru vextir háir og verðbólga mælist 11% á ársgrundvelli (ekki 28% eins og skussar í fjölmiðlum slá fram), en hér er ekki atvinnuleysi að neinu ráði.  Sem þýðir að við öll berum byrðarnar.  Það væri alveg hægt að lækka vexti og draga úr þenslu í þjóðfélaginu með því að segja upp fullt af fólki... láta fáa bera byrðarnar.  Það er líklegast það sem Guðni og Steingrímur vilja.  Lægri vexti á alla, en ca. 16,000 atvinnulausa í staðinn.  16,000 heimili án fyrirvinnu.

Já, göngum endilega í ESB og setjum 16,000 heimili í gjaldþrot.  Og tökum upp gjaldmiðil hvers vaxtastig hentar ekki hagsveiflum landsins.  Allt svo að einstaka kaffihúsakverúlantar geti fengið kósí djobb í Brussel við að skrifa langar skýrslur um nytsemi þess að staðla skilgreiningar á því hvað telst jógúrt og hvað ekki.

Ráðherrar á rökstólum

9 mannréttinda"fulltrúar"?

9 mannréttindafulltrúar?  Er ekki verið að grínast?  Hver og einn er með, segjum, 500þ í laun á mánuði, brúttó, svo leggjast ofan á 40% launatengd gjöld, sem gerir 700þ á mánuði í heildarlaunakostnað per "fulltrúa", sinnum 9 = 6.3 milljónir á mánuði, x 12 sem gerir heilar 75.6 milljónir íslenskra króna á ári í BARA launakostnað vegna einhverra "mannréttindafulltrúa" sem hafa óskilgreint starfssvið og umfang!

Og þetta finnst Sóleyju barasta allt í lagi.  Ekkert mál að hafa 9 manns á launum við það að marka stefnu borgarinnar sem leiðandi í mannréttindamálum.  Auðvitað að hafa 9 manns á launum við að tryggja umsjón með aðgengi fatlaðra að byggingum borgarinnar, svona til viðbótar við alla aðra sem gera slíkt... svona út frá mannréttindalegu sjónarhorni.

Þarf nokkuð frekari sannana við að það er stórvarhugavert að hleypa Vinstri grænum í almannafé, fyrst þeim finnst þetta vera peningum vel varið? 

Borgarstjóri segir yfirlýsingar Sóleyjar ekki réttar

Brýn verkefni borgarinnar, að mati Sóleyjar Tómasdóttur

Sóley Tómasdóttir, fulltrúi Vinstri Grænna, telur upp eftirfarandi á bloggsíðu sinni sem brýn verkefni opinberrar stjórnsýslu:

"Þau nýju verkefni sem borgarstjórinn telur óþörf lúta m.a. að eftirfarandi:

• Vinna gegn kynbundnu ofbeldi
• Efla aðgengi innflytjenda að samfélaginu með áherslu á gagnkvæma aðlögun.
• Átak í atvinnumálum fatlaðra hjá borginni.
• Útrýma kynbundnum launamun hjá borginni.
• Gera húsnæði borgarinnar aðgengilegt fyrir alla.
• Vinna gegn staðalímyndum kynjanna, innflytjenda, fatlaðra og samkynhneigðra.
• Hafa áhrif á erlendum vettvangi sem fyrirmyndarborg á sviði mannréttinda."

Tilefnið er það að núverandi borgarstjórn hefur ákveðið að skera niður ómarkviss og rándýr verkefni, sem virðast hafa haft það eitt að markmiði að ráða inn flokksgæðinga af vinstri væng stjórnmálanna sem eru nýútskrifaðir úr kynjafræðum.

En bíðum nú við.  Ef við gefum okkur að þessi málefni séu öll brýn, af hverju þarf að stofna sérsakt batterí fyrir marga milljónatugi á ári til þess að sjá um þau?

Sér ekki lögreglan um að taka á ofbeldi í samfélaginu, kynbundnu sem öðru?  Þarf kynjafræðing eða alþjóðafræðing til þess, svona til viðbótar við lögregluna?  Er ekki nær að lögreglan vinni gegn þessu ofbeldi sem öðru? 

Er skattpeningum okkar vel varið í að aðlaga innflytjendur að samfélagi okkar?  Er ekki best að þeir sjálfir sjái um það, fari á tungumálanámskeið og annað slíkt, fyrir sinn eigin pening, fyrst þeir taka á annað borð ákvörðun um að flytja hingað?  Hversu margir Íslendingar sem hafa flutt utan hafa fengið ríkisstyrki til að "aðlagast" samfélaginu þar sem þeir bjuggu?

Átak í atvinnumálum fatlaðra er nokkuð sem fjölmörg félagasamtök vinna að.  Þarf virkilega að bæta enn einni "skrifstofunni" við, bara svo hægt sé að búa til aðeins fleiri "verkefnastjóra" hjá borginni?

Væri nú ekki gott að sýna fram á að kynbundinn launamunur sé yfirhöfuð til?  Það hefur aldrei verið sýnt fram á að kynbundinn launamunur sé til staðar í stórum stíl, algeng aðferð til að "sanna" tilvist hans er að segja að karlar og konur séu með ólík laun þegar búið er að leiðrétta fyrir aldri, menntun, vinnutíma, og starfsheiti.  Allir aðrir þættir, s.s. eðli starfs, eðli starfsmannsins sjálfs,  starfsumhverfi, ábyrgð í starfi eru hunsaðir og flokkaðir sem "kynjabreyta".

Er það ekki á ábyrgð eignasviðs borgarinnar að sjá til þess að allir hafi aðgengi að byggingum borgarinnar?  Þarf mannréttindanefnd til þess?

Vinna gegn staðalímyndum?  Hvernig þá?  Til hvers?  Staðalímynd er hvernig fólk sér hópa eða einstaklinga, og er það ekki þeirra sjálfra að breyta því?  Mér finnst t.d. Vinstri Grænir vera hópur ábyrgðarlausra stjórnmálamanna sem krefjast ríkisforræðis og hatast út í einkaframtakið.  Á Mannréttindaskrifstofa að breyta því, eða er það á forræði Vinstri Grænna að sýna mér fram á að þeir séu ekki eins og ég upplifi þá?

Hafa áhrif á erlendum vettvangi sem fyrirmyndarborg á sviði mannréttinda?  Til hvers?  Erum við með eitthvað slæma ímynd fyrir sem höfuðborg mannréttindabrota og kúgunar?  Við höfum hingað til verið ansi mikið laus við slíka gagnrýni, en hver veit hvað gerist í framtíðinni ef Vinstri Grænir fá sínum vilja framgengt. 

 

Hvernig eflum við samkeppni og bætum kaupmátt?

Jú, með því að efla samkeppni og minnka ríkisumsvif.

Við getum t.d. stóreflt samkeppni á smásölumarkaði með því að fella niður tolla og aðflutningsgjöld; að hér séu allar vörur á kostnaðarverði erlendis frá að viðbættum virðisaukaskatti.  Þannig gæti verið efnt til mikillar samkeppni við verslanir, því almenningur gæti verslað í gegnum erlendar netverslanir svo að segja allan varning utan dagvöru með skamman líftíma.

Þegar síðan verslanir geta flutt inn óheft matvæli erlendis frá, t.d. kjöt og mjólkurafurðir, og selt á mun lægra verði í dag (þ.e.a.s. undið ofan af hinni gerræðislegu vinstristefnu af hverri Framsóknarmenn hafa gegnsýrt íslenskan landbúnað), og við búið við matvælaverð sem er sambærilegt því sem gerist og gengur erlendis.

Þegar landsmenn geta farið utan í "verslunarferðir" og komið heim með þann varning sem þeir kjósa til eigin nota án afskipta tollvarða, þá búum við við alvöru frelsi.

Það þarf ekki að ganga í ESB til að þetta gangi eftir, það þarf bara vilja hjá stjórnmálamönnum og þor, nokkuð sem enginn virðist eiga inni, því miður.

Við eflum líka hag almennings með því að lækka skatta og draga úr ríkisafskiptum, því það er löngu sannað (sama hvað Ögmundur Jónasson segir) að ríkið er alltaf með óhagkvæmasta reksturinn og nýtir fjármagnið mun verr en einkaaðilar.  Lækkum skatta, setjum menntakerfið í einkarekstur, sem og heilbrigðiskerfið. 

Og einkarekstur er, sama hvað Ögmundur Jónasson segir, ekki hið sama og einkavæðing - alveg merkilegt hvað fólk sem skilgreinir sig sem vel gefið á erfitt með að skilja muninn á þessu tvennu.

Síðan skal efla skilyrði einkaaðila til að koma inn á markað sem í dag er undir ríkiseinokun.  Ríkið á ekki að vera í virkjanagerð og rafmagnsframleiðslu.  Ríkið á ekki að vera einokunaðili á sölu áfengis.  Ríkið á ekki að leggja stein í götu þeirra sem vilja stofna skóla á hvaða stigi sem það er.  Og svo framvegis.

Í gegnum aldirnar höfum við séð skipbrot vinstrimennskunnar trekk í trekk, það nægir að horfa til Sovétríkjanna, Kína (þar sem nú ríkir fasískur kapítalismi), Kúbu, Norður Kóreu...

Og nú sjáum við ennfremur betur og betur að eftir því sem einstaklingurinn hefur meira frelsi til orða og athafna, þeim mun betur vegnar samfélögunum.  "Fórnin" er sú að þeir sem líta til annara með að sjá sér og sínum farborða, fólk sem ekki axlar ábyrgð á eigin lífi, kvartar og nöldrar og heimtar "gömlu góðu forræðishyggjuna". 

Mesta verðbólga í tæp 18 ár

Takk fyrir þetta

Sunnudagurinn í dag hefur einkennst af því að þjóðin veit núna miklu betur en hún hefur sjálfsagt nokkurn áhuga á að vita hversu vel bæði Símanum og Vodafone gengur að koma upp einhverjum tækjabúnaði upp um allar sveitir.

Þegar annað þessara fyrirtækja rekur við, þá fær hitt niðurgang, þannig er það.

Í morgun þótti það fréttnæmast á landinu, reyndar þó víðar væri leitað, að fólk frá Símanum hefði labbað upp á fjall, og nú gæti fólk sent SMS til vina og kunningja af hæsta fjalli landsins.  Það fannst alla vega mbl.is fréttnæmt.  Rétt upp hönd sem misst hefur svefn af áhyggjum vegna þess að ekki hafi verið hægt að senda MMS frá Hvannadalshnjúk? 

Og viti menn, ekki geta Vodafonemenn verið minni.  Þeir hafa lesið þetta í morgun og hugsað: "Shit, þarna er Síminn aldeilis að skúbba... við verðum að gera eitthvað!  Ég veit, sendum langa og mikla fréttatilkynningu í ALLA fjölmiðla, strax eftir hádegið, þar sem við segjum a) hvað við ætlum að setja upp marga GSM senda, b) hversu margir eru komnir upp, og c) hvernig gengur almennt.  Og tölum svo um hvað við erum æðislegir."

Því það er aldrei að vita, kannski myndu tugir þúsunda farsímanotenda hringja í Vodafone strax í fyrramálið og segja: "Starfsfólk Símans gekk á Hnjúkinn í gær og nú get ég sent SMS frá Hnjúknum ef mér dytti í hug að ganga þangað.  Hvað hafið þið gert?  Ha?  Ha? ???" Og slíkt bara má ekki gerast.  Vindgangur Símans í morgun endaði í bremsufari Vodafone um kaffileytið.

Nýir gsm sendar settir upp

Baráttumál almennings í dag, nýjar uppástungur

hljóta jú að vera fyrst og fremst það að trukkabílstjórar fái að keyra án kvaða um hvíldartíma eða annað slíkt.

Eru það ekki sjálfsögð réttindi okkar allra að við getum fengið að mæta svefndrukknum Sturlu á þjóðvegum landsins, eftir að hann er búinn að keyra í 14 tíma án hvíldar?  Það hlýtur að vera hluti af mannréttindum okkar að eiga það á hættu að hann straui yfir bílinn okkar hvenær sem er, af því að hann vill vinna svo mikið og lengi.

Það er líka í þágu alls almennings að þeir sem eyða mest vegum landsins, þ.e.a.s. þeir sem mest keyra og á stærstu og þyngstu bílunum, borgi helst ekkert í viðhald veganna.  Við almenningur hljótum að krefjast þess að fá að borga meira sjálf fyrir eyðingu á vegum sem trukkararnir sjálfir valda.  Það er ekkert annað en fasismi að krefjast þess að þeir sem eyða vegunum mest borgi mest til að viðhalda þeim og lagfæra.

Ég hef nokkrar hugmyndir fyrir trukkarana sem virðast óðum að verða uppiskroppa með djúsí baráttumál, af því að fólk vill alltaf snúa út úr fyrir þeim og sýna með rökum að þeir hafa rangt fyrir sér.

1) Bönnum örvhendu.  Örvhentir krefjast alls kyns sérréttinda sem hamla almenningi í landinu, t.d. eru mjög margir kaffibollar með hankann vinstra megin, og þar af leiðandi eru mun færri kaffibollar fyrir almenning sem er jú upp til hópa rétthentur.

2) Útrýmum vatnsbólum og virkjunum.  Við hljótum að geta verið sammála um það að fyrst það er vatn í hverjum krana á landinu og rafmagn í hverri innstungu, þá þurfum við ekki allar þessar virkjanir og þessi vatnsból.  Við höfum nóg rafmagn og vatn og því eiga Alþingismenn að fara að vinna vinnuna sína og útrýma þessum virkjunum sem eru ekkert annað en barn síns tíma. 

3) Bönnum Björn Bjarnason.  Hann er svakalega vondur og illa innrættur og hugsar ekki um neitt annað daginn út og inn en að klekkja á almenningi.  Almenningur vill vinna án þess að hvíla sig, vill lemja á löggunni þegar löggan ybbir gogg, vill ókeypis bensín og ekkert múður.  Björn stendur í vegi fyrir þessum sjálfsögðu kröfum almennings.

4) Bönnum gula litinn.  Af því bara.

 

Sturla: Ég berst fyrir ykkur

Þessi frétt er í boði Símans

Gasalega er þetta spennandi.  Ég er sjálfur búinn að vaka síðan kl. 04:00 í nótt til að fylgjast með útsendingunni og þetta er gott sjónvarp.  Gott, segi ég.

Ég hef ekki verið svona spenntur síðan Ellý Ármanns auglýsti húsið sitt til sölu í Fréttablaðinu á föstudaginn ("Læt það ekki fyrir minna en 120 milljónir!").  Góð fréttamennska.

Fylgist með þann 1. maí þegar mjólkurfræðingar frá Flóamönnum fara á kajak út í Kolbeinsey til að kanna hvort nýja hundamjólkurjógúrtið þoli flutning á sjó við erfiðar aðstæður.  Það fara víst 34 manns og 10 fararstjórar, bein útsending í gegnum vefmyndavél Mjólkursamsölunnar og alles.

Það verður ekkert smáspennandi, og rökrétt framhald af þeim hæðum sem íslensk fjölmiðlun er að ná um þessar mundir.  Mér skilst að Lára Ómarsdóttir muni hafa náð samningum við langvíur í Kolbeinsey þess efnis að þær grýti eggjum sínum í mjólkurfræðingana þegar þeir koma að landi... og allt í beinni.

Bein útsending frá Hnjúknum