Hverjir ráða í ESB?

Eru það kerfiskallar sem enginn hefur kosið, eða eru það fulltrúar íbúa í sambandinu?

Asnalega spurt, auðvitað, því eins og allir vita þá eru það kerfiskallarnir sem ráða öllu innan sambandsins.

En engu að síður, meðan ekkert í lögum sambandsins útilokar upptöku evru í gegnum EES samninginn, þá er þetta alltaf spurning um hvað þjóðum ESB og EFTA finnst, s.s. pólitísk spurning.  Og við fáum ekki það ábyrgt svar frá einhverju ídoli hans Eiríks Bergmanns í bákninu í Brussel.

Það verður samt gaman að fylgjast með því hvernig Samfylkingarfólk mun tönnlast á þessu: "Nei, það er bara ekki hægt, hann Herr Olli Rehn sagði að það barasta væri ekki hægt!" svona eins og sönnum sveitalubba sæmir sem mætir á mölina og er vísað til baka af drukknum klósettverði.  Því Samfylkingin svífst einskis í að reyna að troða ESB hugmyndinni ofan í kokið á þjóðinni með góðu eða illu, þá gildir einu hvort blekkja skuli landsmenn eða kjafta niður krónuna. 

Neikvæð viðbrögð frá ESB koma ekki á óvart

Ögmundur Jónason nær nýjum lægðum í ómerkilegheitum

Ögmundur Jónasson verður seint sakaður um að vera heill stjórnmálamaður eða merkilegur pappír.  Hann er þó iðinn við að finna nýjar lægðir í hegðun og framferði, og á hvert metið á eftir öðru í skítkasti, blammeringum, og dólgslátum.

Nýjasta útspil hans má finna á bloggsíðu hans, ogmundur.is, þar sem hann hefur eytt kvöldstund eða svo í photoshop og "peistað" andlit heilbrigðisráðherra yfir mynd einhvers annars aðila sem tekur í hönd Gaddafis, Lýbíuleiðtoga.  

Ögmundur kallar eftir vitsmunalegri umræðu um mál, og spilar svo þessu út.  Það segir allt sem segja þarf um það í hversu miklu jafnvægi þessi maður er.

Annað sem hann hefur gert sér mat úr er koma "sérfræðinga" í málefnum heilbrigðiskerfa sem hafa verið duglegir að tjá sig um "afleiðingar" einkarekstrar í slíkum kerfum víða um heim.  

Ögmundur hefur af rausn sinni sem formaður BSRB seilst í sjóði félagsmanna þar og borgað fyrir komu þessara "sérfræðinga" sem eiga beint að aðstoða veikburða málstað VG í nöldrinu gegn nauðsynlegum umbótum á heilbrigðiskerfinu.  Hvernig ætli þeim sem neyðast til að vera í BSRB en hugnast ekki málflutningur formannsins eða VG líki það að þurfa að borga fyrir áróðursmaskínum Vinstri Grænna?

 

Öll stjórnin, nema...

Nema Þórunn Sveinbjarnardóttir. 

Ingibjörg "hérerekkikreppa" Sólrún styður álver á Bakka þegar hún er fyrir norðan heiðar en ekki þegar hún er fyrir sunnan heiðar.

Aðrir þingmenn Samfylkingar styðja álver á Bakka, þangað til skoðanakannanir sýna að þeir ættu að hafa aðra skoðun.   

Stundum vill Samfylkingin virkjanir, og stundum ekki.  Og til að gera þetta enn skemmtilegra þá er það aldrei að allir þingmenn Samfylkingarinnar séu á sömu skoðun á sama tíma, en þeir flakka allir á milli skoðana stöðugt.

Samfylkingin er að leggja landið í rúst með botnlausu aðgerðaleysi sínu, og það virðist sem svo að Samfylkingin haldi Sjálfstæðisflokki í gíslingu í ríkisstjórn og komi í veg fyrir að nokkuð sé gert.  

Sem kemur í sjálfu sér ekki á óvart þegar horft er til ofsahræðslu Samfylkingarinnar við að grípa til aðgerða, flokkurinn sá vill frekar ræða hlutina fram og til baka án þess að nokkur niðurstaða fáist (hver man ekki eftir Sundabrautarruglinu hjá Degi B. Eggertssyni?).

Jóhanna Sigurðardóttir skilur ekkert í því af hverju "aðgerðir" ríkisstjórnarinnar í húsnæðismálum skili ekki neinu, þegar ljóst var í upphafi að ruglingslega reglur um niðurfellingu stimpilgjalda (kratíska leiðin að taka góða hugmynd og eyðileggja hana í framkvæmd með miðstýringu og vitleysisgangi) myndu gera þetta gagnslaust og ónýtt.  

Nú þarf að virkja fallvötnin og gufuna, nýta orkuna til að laða að erlenda fjárfestingu og hætta að hlusta á kommúnistana sem eru sífellt á móti öllu, og fjallagrasaétandi náttúruverndarhippa sem lifa sem afætur á skattgreiðendum.  Skynsemin þarf að komast aftur vil valda og ef það þýðir að Samfylkingunni þurfi að sparka úr stjórn, þá það. 

Stjórnin styður álver á Bakka

klárlega BJÁNALEGASTA frétt dagsins

Þær verða ekki mikið bjánalegri fréttirnar.

Af hverju skiptir máli hver  bjó í íbúðinni á undan erlenda farandverkamanninum?

Þarf ekki leyfi allra í húsinu á Njálsgötu til að halda hest í íbúðinni, eða nær leyfið bara til þess að halda kött?

Hvernig getur íbúð verið "nánast seld"?  Annað hvort er hún seld eða ekki.

Þetta er klárlega verst unna frétt ársins, og kjánalegasta frétt dagsins.

Dýrasta og ódýrasta húsnæðið

Og bókin fjallar um...

Það hvernig ógeðslega vondur stjórnmálaflokkur ræðst gegn góðum kaupmanni og leggur hann í einelti.  Vondi kallinn er formaður flokksins sem verður svo bankastjóri, og heldur áfram að níðast á hinum góðhjartaða kaupmanni og vinum hans, sem allir eru svo bjartir og góðir og eiga þann draum heitastan að allir lifi í sátt og samlyndi og líði vel sem hérað í góða landinu ESB.  En vondi bankastjórinn vill það ekki.

Svo blandast inn í ógeðslega vondur lögreglustjóri sem vill her og öryggislöggæslu út um allt, en frábær fyrrum borgarstjóri (og rosalega góður læknir) berst eins og Hrói Höttur fyrir hagsmunum litlu dýranna í skóginum, sem auðvaldssvínin eru að útrýma.

Það þarf ekki mikinn speking til að giska á að Hallgrímur Helgason ætlar að tala ENN EINU SINNI um Baugsmálið og hvað Davíð sé vondur.  Og hvað Samfylkingin sé æðisleg. 

Hallgrímur Helgason hefur lokið fyrstu drögum að nýrri skáldsögu

Samfylkingin ekki á sama máli

Samfylkingin er ekki á því að hér verði að tryggja fulla atvinnu, alla vega ekki hjá þeim Samfylkingarmönnum sem aðhyllast Fagra Ísland.  Þetta fólk hefur engan áhuga á að hér verði nýttar auðlindir til atvinnusköpunar.  Þetta fólk á helst samleið með Steingrími J. sem virðist róa að því öllum árum að upp verði tekið árið 1979 á nýjan leik.

Samfylkingin er auðvitað flokkur glundroðans og þar er hver höndin upp á móti annari í öllum málum.  Nema reyndar ESB málum, þar sem allir virðast vera sammála um að best sé að afsala okkur fullveldi og hlaupa í pilsfald Brussel.  Samfylkingin, í öllum öðrum málum, hefur nákvæmlega enga stefnu aðra en þá að telja sem flestum trú um að hún tali þeirra máli, án þess þó að tala máli nokkurs. 

Samfylkingin situr uppi með léttu ráðuneytin þar sem mjúku málin liggja, þar sem auðvelt er að vera með gaspur og kjördæmapot.  Að sóa almannafé í hverja vitleysuna á fætur annari.  Samgöngumálin eru föst í 19. öld, þökk sé Kristjáni Möller og þeim milljörðum sem hann dælir í sitt kjördæmi eingöngu.  Sundabrautin er svæfð af Samfylkingunni, sem og flugvallarmálið.

Glundroðinn til vinstri hefur sjaldan verið jafnskæður og núna, þegar við höfum í eina röndina kommúnistana í VG sem heimta að allt verði fært aftur um 30 ár, Samfylkingarliðið sem getur bara sammælst um að láta aðra sjá um að reka landið (hvort sem það er Sjálfstæðisflokkur eða báknið í Brussel), og Framsókn sem vill bæði stórauka ríkisumsvif OG lækka skatta (sem segir sitt um geðheilsu þess elliæra flokks).  Ef þessir flokkar fá að koma að ríkisfjármálum á næstu misserum (á reyndar ekki við um Samfylkinguna sem forðast ábyrgð og ákvarðanir eins og pláguna) er hætt við að hér verði alvöru kreppa, svo djúp að meira að segja Ingibjörg "hérerenginkreppa" Sólrún getur ekki mælt því í mót.

Forgangsverkefni að tryggja fulla atvinnu

Stefnuleysi Samfylkingarinnar skilar ráðleysisfylgi

Samfylkingin er flokkur stefnuleysis og glundroða.  Það sem Samfylkingin gerir best er að telja mjög mörgum trú um að hún tali máli þeirra, án þess að gera það í raun og veru.  Í því sambandi leggur Samfylkingin höfuðáherslu á að hafa eins óljósa stefnu í málum sem frekast er unnt; að tala og tala en segja ekkert (þar er meistari Blaðursins, Dr. Dagur, fremstur í flokki).

Svo er það líka gott hjá Samfylkingunni að hafa margar skoðanir á sama málinu, t.d. hefur umhverfisráðherra allt aðra skoðun á umhverfisvernd en iðnaðarráðherra, og svo hefur viðskiptaráðherra enn eina skoðunina.  Og utanríkisráðherrann, Ingibjörg "hérerenginkreppa" Sólrún, segir að allir séu sammála.

Samfylkingin er flokkur hégómans.  Samfylkingin hefur enga getu eða þor til að takast á við vandamál nútímans, heldur snýr öllu upp í ESB áróður.  Svona eins og Frjálslyndir snúa öllu upp í kvótakerfis áróður.  Þó svo að örlítil eftirgrennslan sýni að ESB er vondur kostur og óraunhæfur næstu árin þess utan.

33% þjóðarinnar heldur að Samfylkingin sé akkúrat að berjast fyrir þeirra málefnum.  33% þjóðarinnar lætur því blekkjast.  Samfylkingin berst ekki fyrir málefnum neins.  Samfylkingin stundar umræðustjórnmál þar sem allt gengur út á að þykjast vera rosalega upptekin við að vinna vinnuna sína, en koma sér aldrei að verki.  "Smoke and mirrors" eins og það kallast á engilsaxnesku.

Sem betur fer munum við sjá Samfylkinguna hrynja þegar dregur að kosningum, eins og gerist alltaf hjá henni (og forverum hennar), því þá fara kjósendur að skoða verkin sem eftir flokkana liggja, og þá er listinn alltaf stuttur hjá Samfylkingunni.  Og þá þurfa flokkarnir líka að tala um hvaða áherslur þeir muni leggja fram, og þá hverfur alltaf ESB umræðan hjá Samfylkingunni.

Jú, þetta er slæm niðurstaða fyrir þá sem vilja einstaklingsfrelsi og sem vilja standa vörð um fullveldi Íslands, en sagan segir okkur að Samfylkingin mun hrynja þegar á reynir.  Ekki er nú frammistaða flokksins hingað til neitt til að hrópa húrra fyrir.

Samfylkingin með mest fylgi

Spillingin hjá hinum há-heilögu Vinstri Grænum

Vinstri Grænir fara mikinn þessa dagana, oftar sem áður, og sjá spillingu hjá öðrum stjórnmálaflokkum.  Allt orkar víst tvímælis í huga hinna skinhelgu VGista.

Skoðum aðeins feril Vinstri Grænna undanfarið árið í spillingarmálum þeirra sjálfra.

Síðasta haust, þegar Svandís Svavarsdóttir var í minnihluta í borgarstjórn, fór hún í mál við Orkuveituna.  Réði sér lögfræðing og höfðaði dómsmál, þrátt fyrir að henni hefði verið bent á að hún ætti ekki möguleika á að vinna málið.  Í hennar huga var það aukaatriði, hún var svo ósátt við OR að hún bara fór í mál.  Svo komst Svandís í meirihluta og þá var allt í einu gríðarlega mikilvægt að "róa umræðuna".  Svo rúllaði dómsmálið áfram og lögfræðingur Svandísar hélt gjaldmælinum gangandi.  Loks þegar mælirinn var stöðvaður var reikningurinn alls 800þ krónur fyrir veitta þjónustu, en þá var málið látið niður falla (enda Svandís með tapað mál frá byrjun).  Og hvað gerði Svandís Svavarsdóttir?  Jú, hún sendi Orkuveitunni reikninginn og lét skattgreiðendur í borginni borga fyrir sitt eigið fjölmiðlastönt.  Gott að vita að fulltrúar Vinstri Grænna geti farið í mál við Pétur og Pál og svo bara sent okkur kjósendum reikninginn.  Svandís sá litla ástæðu til að borga sjálf fyrir kostnað sem lögfræðingur lagði út í fyrir hana sjálfa.

Nú síðust daga hefur komið í ljós að Árni Þór, kommúnisti par excellance, sá sig knúinn til að tékka sig inn á dýrindis hótel í borginni í opinberri heimsókn í Reykjavík.  Það var of mikið mál að keyra í 7 mínútur heim til sín og spara þannig skattgreiðendum peningana.  Árna finnst þetta mál allt tóm vitleysa. 

"Í samtali við fréttastofu sagði Árni Þór Sigurðsson, þingmaður Vinstri grænna, að sú væri venjan að gista yfir nótt í vettvangsferðum samgöngunefndar og hann sæi ekki ástæðu til að breyta því þó ferðað væri á höfuðborgarsvæðinu. Auk þess hefði verið fundað fram á kvöld á hótelinu og aftur um morguninn.

Samkvæmt upplýsingum frá skrifstofu Alþingis kostaði hvert herbergi tólf þúsund krónur, samanlagt 72 þúsund krónur."

Auðvitað eiga fjölmiðlar ekkert að elta ólar við svona mál, gæti Árni hugsað.  Árna finnst sjálfsagt að skattgreiðendur borgi hótelherbergi undir sig ef honum sýnist svo, það eru nefnilega ákveðin hlunnindi sem fylgja því að vera þingmaður. 

Forsetinn er, eins og allir vita, kommúnisti.  Og mikill vinur ráðamanna í VG.  Í gær var ólafur ragnar staddur á Íslandi (söng og trallaði við Arnarhól og hlaut álagsmeiðsli við að næla hrúgu af orðum á brjóstkassa íþróttamanna... á Bessastöðum... sem eru á Íslandi).  Í morgun birtist eftirfarandi tilvitnun í forsetaritara þegar hann var spurður um kostnað við ferðir ólafs og ó-íslenskumælandi konu hans til Kína: "Ferðin stendur enn yfir, lýkur ekki fyrr en í fyrstu viku næsta mánaðar, og því óljóst á þessu stigi hve kostnaðarsöm hún verður þegar öll kurl koma til grafar."

Síðast þegar ég vissi var Ísland ekki í Kína og þá segir rökfræðin mér að ef ólafur er staddur á Íslandi er hann ekki í Kína, og þar af leiðandi er það ansi langsótt að hann sé enn í heimsókn í því ágæta landi.  Ekki eru íslenskir kommúnistar mikið að gagnrýna forsetann fyrir að þiggja (væntanlega) laun og dagpeninga fyrir ferðalög í Kína meðan hann er staddur heima hjá sér. 

Hvernig væri að fjölmiðlar myndu skoða þetta mál ofan í kjölinn og kanna af hverju forsetinn er skráður í ferð til útlanda þegar hann er sannanlega staddur hérlendis.  Og hvaða greiðslur fær hann fyrir þessa plat-ferð?

En það er nú þannig í huga kommúnistanna að siðferði allra þeirra sem eru þeim ósammála sé í molum, en þeir sjálfir geti hreinlega aldrei gert neitt rangt.   Soldið svona páfa-komplex.

K J Á N A H R O L L U R !!!

Ég held að ég hafi aldrei fengið eins mikinn kjánahroll og í dag.  Jújú, landsliðið stóð sig frábærlega, þeir eiga hrós skilið... en að fara á palli um miðbæinn og láta gamla Stuðmenn tralla á sviði í miðbænum er bara tú möts.

Þetta er með eindæmum hallærislegt.  ólafur ragnar að tala um hvað hann sé frábær og þetta hafi verið frábært í beinni í Kastljósinu (kjánahrollurinn nær hámarki þegar hann ákveður að splæsa orðu á allt liðið, rétt si sona).

Þegar Vilhjálmur Einarsson veifaði fólki ofan af sviði.

Þegar dorrit opinberaði að eftir öll þessi ár sem forsetafrú okkar og íbúi landsins, þá kann hún ekki ennþá íslensku.

Þegar Laddi mætti í gervi Bjarna Fel... það einhvern veginn kórónaði kjánaskapinn.

Til hamingju, landsliðið, með árangurinn.  Frábært.  Meiriháttar.  En fyrr má nú rota en dauðrota í fagninu hjá þjóðinni. 

Mér dettur helst í hug að fyrst það var Miðborgarstofa sem skipulagði "hátíðina", hafi það verið Jakob Frímann sem kallaði í Valgeir Guðjóns og saman kokkuðu þeir upp þetta hámark hallærisleikans sem við sáum í dag.  Þetta hefði verið fyndið ef ekki hefði laumast að manni sá grunur að skipuleggjundum hafi verið fúlasta alvara.

Ég er reyndar líka algerlega mótfallinn því að veita ÖLLUM liðsmönnum fálkaorðuna, mér finnst verið að gjaldfella þá orðu gríðarlega þegar menn mega ekki slysast til að standa undir væntingum án þess að fá orðu.  Það er bara mín skoðun, mér finnst að forseti eigi ekki að drita út orðum í einhverri geðshræringu sinni (eða ó-íslenskumælandi konu sinnar).

Ótrúleg gjöf að vera Íslendingur

Ótrúlegur Ólafur

Ef menn vissu ekki svarið fyrirfram, þá væri ef til vill lag að spyrja: "hvað er eiginlega að manninum?"

Við erum að sjá nýjan Ólaf í fréttum þessa dagana, mann sem opnar vart munninn án þess að a) tala um hvað Sjálfstæðisflokkurinn í borginni sé mikið samansafn mannlegra úrhraka, b) hvað hann sjálfur hafi bjargað öllum frá téðum úrhrökum, og c) að hann sé talsmaður ca 80% landsmanna.  Án þess að útskýra af hverju fáir sem engir vilja að hann komi nálægt nokkru sem tengist borgarmálum nokkru sinni framar.

Rétt upp hönd sem trúir orði af því sem þessi trúður segir?  Nei, mig grunaði það.

Og nýjasta útspil þessa hirðfífls er að ganga til liðs við Frjálslynda... aftur... eftir að hafa verið óháður, í F lista, í Íslandshreyfingu, og þar áður í Frjálslyndum.  Og þar áður í Sjálfstæðisflokki.  Og enginn getur hugsað sér að vinna með manninum, og meira að segja Frjálslyndir, sem hafa varla efni á því að hafna nokkrum sem virðir þá viðlits, taka honum ekki fagnandi.  Hvað segir það um Ólaf að þegar hann tilkynnir komu sína í flokk sem enginn kýs og enginn fílar, þá vill flokkurinn helst ekki fá slíka sendingu. 

Ólafur er óttalegt flón og með ólíkindum að hann skuli halda að hann eigi erindi í pólitík.  Vonandi hverfur hann hraðar en málefnaskrá Samfylkingar þegar valdastólar eru í boði.

Fjöldauppsagnir ekki á döfinni hjá borginni